KUCHING, 29 Jan: Pedagang lada patut berani ngerandang makit produk ke menua luar nyadi siti peluang ngerembaika dagang produk dalam menua, ku Kaban Parlimen Puncak Borneo, Datuk Willie Mongin.
Ku iya, mayuh ejensi perintah mantu raban pedagang ngerembaika sayap dagang sida ngagai tikas global.
“Kitai patut berani ngerandang enggau meda menua luar nyadi pelasar ngulihka peluang dagang.”
“Pekara tu laban dalam peragam menua, nyangka iya enda chukup tang aku pechaya pengudah kita enggau semua berati enggau ngerandang makit ba menua kitai, kita semua patut angkat ngerembaika makit menua baka produk lada dalam menua ngagai makit dunya,” ku iya rambau Pengerami Makai Lemai Gala Nang Ori di Waterfront Hotel, Hari Enam.
Entara ejensi perintah ke mantu ku iya baka Majlis Amanah Rakyat (MARA), Kaunsil Lada Malaysia enggau Serikat Pasar Raya Besai ti bejalaika tanggungpengawa besai dalam ngerembaika makit produk dalam menua ngagai menua luar.
“Aku mega deka meransang pedagang dalam menua seruran beratika menua luar enggau ngerebut peluang-peluang ke bisi dikena ngelakuka produk dalam menua baka lada ngagai renggat dunya.
“Aku andal MARA, Pasar Raya Aeon enggau Pasar Raya Besai Lulu ulih meri bantu lalu ngarika menua kitai ba makit dunya lebih agi ba menua baka Emiriah Arab Bersatu (UAE) enggau Dubai,” ku iya.
Berebak enggau nya, Willie mega ngarap deka mayuh agi serikat besai datai mantu pedagang lada di menua tu.
Sama bisi datai Direktor MARA Nengeri Sarawak, Dr Azmi Amat Murjan. – TVS
