KUCHING, 28 Jan: Opis Kereja Raya (JKR) Sarawak endang dikearap ulih bejalaika projek perintah besai ba baruh kos RM50 juta.
Sapit Premier Sarawak, Datuk Amar Douglas Uggah Embas madahka, Menteri Besai Datuk Seri Anwar Ibrahim udah dipadahka senentang opis nya ngembuan mayuh peneleba bejalaika projek besai di serata nengeri tu lebuh nemuai ke Kuching apin lama ke udah.
“Aku pechaya JKR ulih ngesan tangkup pengawa tu enggau manah, taja pan bisi maya napi pemar lebih agi Sarawak tu siti kandang menua ke besai.
“Tang, kitai mesti senaka ulih bejalaika projek baka ke udah ditetapka sereta nentuka kualiti tetiap projek ke digaga di serata nengeri tu,” ku iya madah rambau ngulu licha JKR senentang pemansang projek di Bagi Menua Kapit ba Indu Opis JKR, Wisma SABERKAS lebuh Hari Lima.
Licha nya diberi Direktor JKR Sarawak Ir. Ts Richard Tajan enggau pegawai kanan iya sereta digulu Sekretari Tetap Opis Menteri Infrastruktur enggau Pemansang Penyangkai Kapal Chiew Chee Yaw.
Sebedau ngulu licha nya, Uggah bejadika Opis Direktorat JKR Sarawak ke mega ba Wisma Saberkas.
Menteri Besai ba pun bulan tu tadi madahka Sarawak enggau Sabah diberi pemendar bejalaika projek ba baruh RM50 juta sereta enda ibuh minta pemendar ari Putrajaya.
“Autonomi tu enda agi nengah birokrasi enggau ulih mutarka isu projek laun tembu,” ku iya madah.
Berebak enggau nya, Uggah ke mega Menteri Infrastruktur enggau Pemansang Penyangkai Kapal minta bejalaika pengawa meratika Standard Atur Pengawa (SOP), sistem, pengereja pengawa sereta chara ke patut dikena nentuka tetiap projek ulih digaga enggau manah.
Naka ke diatu, iya puas ati meda Rikod Pemanah Pengawa (KPI) JKR Sarawak ke mujur nyapai ‘Kusung Projek Sakit’.
“Aku ngarapka pemujur ke dijapai tu ngangkatka pemanah nama JKR ti nyadi siti ari opis perintah dalam taun tu,” tandu iya. – TVS
