LIMBANG, 24 Jan: Sarawak deka terus mansang kelimpah diberi perati ari Perintah Penyerakup ba baruh iring Menteri Besai Datuk Seri Anwar Ibrahim.
Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail madah, Menteri Besai mega ngandalka Sapit Menteri Besai Dato’ Sri Fadillah Yusof dalam ngiring komiti dikena mulaika baru hak-hak ba baruh Sempekat Malaysia 1963 (MA63).
“Kitai pechaya Malaysia deka lebih beserakup ba baruh iring ke baru enggau sukung ari semua parti ba baruh Perintah Penyerakup tu, lalu tu ulih ngasuh Sarawak nerima mayuh pemansang kelebih agi enggau pengandal ti udah diberi iya ke dipebasa Sapit Menteri Besai Dato’ Sri Fadillah ti ngiring komiti mulaika baru Sempekat MA63 nya enggau bisi sekeda pekara udah ditemu enggau penemuai iya ke dipebasa Menteri Besai dua tiga hari ke udah (sebedau tu),” ku iya.
Kaban Kunsil Nengeri (ADUN) Bukit Kota nya mega andal deka mayuh agi pekara ulih dituntut bekaul enggau hak MA63 ungkup pengelantang rayat Sarawak.
“Aku pechaya deka mayuh agi , baka ke udah ditetap dalam sempekat nya deka dipulaika baru, lalu deka meri pengelantang ukai semina ba sebelah selatan Sarawak di Kuching, tang deka ngaul serata nengeri nyengkaum kitai ba utara tu, lalu tu deka ngerichahka pemansang ke udah dipejalaika, benung dipejalaika sereta ti deka dipejalaika jemah ila kelebih agi ke diatu, enti ba sebelah kitai di Limbang tu, isu ti suah dibantai iya nya isu meri servis pengerai kelebih agi begunan tebangkar nya empu,” ku iya agi. – TVS
