BINTULU, 22 Jan: Adat ngabang ngagai kaban belayan maya pengerami siti daya idup ke badas enggau patut terus dikemeran ke rayat pupu bansa di menua tu.
Menteri ba Opis Premier Sarawak, Datuk John Sikie Tayai madahka, ambika chunto, pengerami Taun Baru China serak tu ukai semina diintu korasia (komuniti raban mensia) nya aja, tang mega dirichahka enggau penatai bala pengabang ari bansa bukai.
Tu mih kelai penyerakup ti mesti ditan awak ke meruan dititih nyentuk ke jemah ila.
Iya madahka, ngabang ngagai pangan diri tetiap kali musin pengerami nanda ke kitai ulih diau begulai enggau likun, sama bebasaka pangan diri taja pan bisi bida ari sukut jalai pengarap, budaya enggau adat.
“Ukai semina pengerami Taun Baru China aja kitai begulai baka tu. Pia mega, maya Gawai Dayak, Hari Raya enggau ke bukai.
“Kitai di Tatau ditu baka sehari tu bisi bansa Iban, Melayu, China, Orang Ulu sama ngabang ngagai rumah Penghulu Lim Tcia Hong,” ku iya madah rambau dirandau beserimbai enggau Pengerami Taun Baru China ba rumah Penghulu Lim Tcia Hong lebuh Hari Minggu.
Beduduk enggau nya, John ke mega Kaban Kunsil Nengeri (ADUN) kakus nerangka, penyerakup rayat pupu bansa di nengeri tu beguna amat ngambi ke sarawak ulih nyingkang maju ke mua.
“Ambika chunto, rayat kitai di Tatau ulih idup begulai sejalai enggau pangan diri, nadai belaya, besaup ngereja pengawa sereta pekara tu mega dikemeranka rayat di serata Sarawak.
“Penyerakup kitai di Sarawak nyadi chunto tauka teladan nengeri bukai di Semenanjung,” tandu iya.
Entara temuai bukai ke nyempulang iya dalam program ngabang, bini iya empu Datin Melia Gelen, Kaban Dewan Negara, Senator Rita Sarimah Patrick Insol, Pegawai Pelilih Tatau, Jabang Juntan, Pegawai Tadbir Pelilih Tatau, Calvin Ligong, Winnie Dian, Pemanca Geosen Jubin.
Sebedau tu, maya meri Pesan Khas Taun Baru China 2023, Sapit Premier Sarawak, Datuk Amar Awang Tengah Ali Hasan madahka Komuniti Cina ti ngaul diri ba dalam sektor dagang dikearap ulih terus mujur begulai enggau bansa bukai ba menua tu, seraya bela terus ngasaika pengelantang enggau penyenang.
Pia mega, rapat nya bisi daya nentuka semua rayat bela nyapai pemujur dalam pengidup sereta nyaup perintah ngemansangka Sarawak. – TVS
