GEDONG, 21 Jan: Perintah Sarawak udah ngelala endur makmal (palan bejalaika pansik) luar ngembuan pemesai manggai 30 ikar di Lubok Punggor ti deka alai Universiti Pertanian Malaysia bejalaika pansik ngagai padi Biris.
Premier Sarawak, Datuk Patinggi Tan Sri Abang Johari Tun Openg madah perintah udah ngulihka pemendar kerejasama ari orang ke ngempu tanah nya lalu makmal ti deka didiri deka disikap enggau perengka teknologi baru.
“Kitai mesti nguji nambahka rega ari sukut pengeluar berau Biris. Ambika chunto kitai ulih ngeluarka produk-produk baka tepung berau. Tepung berau ulih dikena ngaga biskut ke ngundan angi ari berau biris. Tu endang teknologi baru,” ku iya.
Iya madah munyi nya nengah sebengkah aum pemberita pengudah bejalaika pengawa ngagai pelilih Gedong, ditu sehari tu tadi.
Ku iya nyema mujur, perintah deka ngerembaika agi ngagai sitak bukai ngasilka berau tu baka Sri Aman.
“Nama utai ke digaga kitai tu nyema iya mujur, iya deka dikerembai agi. AKu udah meda asil pansil ba makmal kampus besai lalu bisi pemujur.
Lalu enti makmal ba luar tu enggau umai tu mujur, nyadi kitai deka ngaduka model awak ulih dikemujur ba sitak mansutka berau ba endur bukai nyengkaum ba Sri Aman,” ku terang iya.
Sehari tu tadi, Abang Johari ke mega Kaban Kunsil Nengeri (ADUN) Gedong ngatur penemu seraya gawa ke taba projek di Jalai Lubok Teranggas ke Kampung Gedong enggau taba projek Mini Isthmus Gedong.-TVS
