KUCHING, 15 Jan: Pengerami Taun Baru China (TBC) suah dikaitka enggau pengawa bemain merchun enggau bungai api.
Tang, nyerumba pengagit ati ngintu pengerami nya, sukut pengelikun baka nyeliahka penusah angus patut dikemerat dikena nentuka pengaga ati enda betukar nyadi penusah.
Sapit Premier Dato Sri Dr Sim Kui Hian madah, 90 peratus penusah angus nyadi ari ulah orang ti bemain merchun nyadi penusah nya kebendar ulih diseliah.
“Kitai chukup betuah laban ngembuan bakih kunsi ari Yayasan Farley enggau Sin Chew Daily.
“Pia mega tu endang atur ke manah dikena mantu nentuka pesan nya ulih datai ba pending orang dituju.
“Diatu chukup mayuh gerup Whatsapp (WS Group) ke ulih dikena nyebar penerang baka tu laban enti dituntung penusah angus, sida deka nemu pekara ke patut digaga, ukai semina mantaika tunjuk jari enggau lengkas ngelawa palan penusah ketegal deka ngambi gambar,” ku iya.
Iya madah munyi nya maya dirandau media pengudah program Kimpin Pengelikun Penusah Angus nyerumba Taun Baru China 2023, kena Hari Lima.
Berebak enggau nya, Direktor Opis Bomba Enggau Penyah Penusah Malaysia (JBPM) Sarawak, Dato Khirudin Drahman madah, opis iya deka suah agi bejalaika pengawa matau nyerumba pengerami Taun Baru China dikena nentuka raban nya ulih meri timbal jampat nyema bisi nyadi penusah enda disadang.
“Kami mega nambahka penyikap diri, nengah pengawa matau lebuh malam hari kami ngelawa sekeda endur, dalam kandang tiga hari sebedau pengerami. Kami deka suah agi datai maya nya.
Ari pukul 12 pagi bejalaika pengawa matau, nyema raban kami bisi nerima kangau, nyadi kami ulih nimbal enggau lengkas lalu berebak enggau nya kami deka sida ngasaika diri likun laban bisi bala bakih sida iya nya Opis Bomba bisi datai mantu maya sida dituntung penusah,” ku iya.
Khirudin madah program nya diatur nyerumba pengerami Taun Baru China nyadika kelai nadai bansa ti dikelaung ari program pengelikun penusah angus ba renggat wilayah Sarawak.-TVS
