KUCHING, 14 Jan: Opis Menteri Industri Pemakai, Komoditi enggau Pemansang Kandang Menua Sarawak (MFICORD) diberi timpuh enam bulan endur ngasilka pemakai jelu tupi ari rampang sawit.
Premier Sarawak Datuk Patinggi Tan Sri Abang Johari Tun Openg madah, nya entara atur pemungkal ke digaga perintah Sarawak dikena meri pemaik ngagai pusin ekonomi ba menua tu sereta dikena nyaga rega makit komoditi lebih agi manuk enggau telu.
“Kitai bisi pun penatai dikena ngeluarka pemakai jelu, aku udah meri opis menteri kitai enam bulan endur ngasilka pemakai jelu kediri ngena rampang sawit.
“Tu ulih digaga, aku ngasuh SALCRA ngepunka pekara tu lalu aku meri puku benih dikena ngasilka pemakai jelu nyengkaul jelu chapi tauka ke bukai ke ditupi kitai.
“Nyadi nya datai ari kitai empu, lalu rega ulih atur kitai empu. Ba sukut ekonomi tu pekara ke baru ke ulih digaga kitai,”ku iya.
Iya madah munyi nya maya bejadika pengerami Anugerah Pedagang Bumiputera Sarawak (AUBS) 2022 ba sebuah hotel ditu, malam tadi.
Abang Johari mega nangkan sida ke bisi penemu ba bidang kimia, biologi enggau veterinar patut nyerungkai bidang dagang ke baru tu.
Dulu ari nya kena hari empat, Abang Johari maya mantaika Pesan Perdana madah, Sarawak ulih ngasilka pemakai jelu diri empu dibanding semina bepanggai ngagai pemakai jelu ke diimpot.
Pengandal ati nya dibantaika iya laban meda pun penatai biomas di Sarawak ulih digaga nyadi baja.-TVS
