SIMUNJAN, 8 Jan: Opis Menteri Pengerai Malaysia (KKM) nerima langgur senentang taba alai ngaga Sepital Simunjan ke baru.
Sapit Menteri ke nguasa opis menteri nya, Lukanisman Awang Sauni madah, perambu nya mega diterima Opis Pengerai Nengeri Sarawak (JKNS).
“Taba kitai bisi dua alai ke deka dipilih semina projek tu mesti dirintaika dulu ba dalam projek Rolling Plan Keempat Langgur Malaysia Lumpar Ke-12 (RMK-12) enggau kitai deka projek ke pemadu dirandaka baka tu terus diberi perati tauka dikemeratka,” ku iya rambau aum pemberita pengudah ngabas Klinik Indai enggau Anak sereta Sepital Simunjan.
Beduduk enggau nya, iya nerang, JKNS mega udah mantaika 18 perambu ngagai KKM sereta pekara nya deka diperati.
“Bisi 18 projek ti dipelaba aku udah dirintai sereta aku udah meda pekara tu enggau kitai nganti pemutus ke positif pengudah aum milih projek ba baruh projek Rolling Plan Keempat Langgur Malaysia Lumpar Ke-12 (RMK-12) ti deka diputuska ba dalam timpuh ti deka datai tu,” ku iya.
Lukanisman ke mega Kaban Parlimen Sibuti madah, Komiti Sempekat Malaysia 1963 mega beratika silik senentang pengawa ngemanahka palan pengerai di Sarawak.
Pengawa nya ti dituaika Sapit Menteri Besai, Datuk Seri Fadillah Yusof deka nentuka pemansang perengkaguna pengerai ba tikas ke lebih manah di Sarawak senutuk enggau kuasa ba baruh Sempekat Malaysia 1963 (MA63).
Temuai bukai ke bisi ngulu pengawa ngabas nya, Direktor Sepital Simunjan, Dr. Noraziela Morney, Direktor JKNS, Dr. Ooi Choo Huck, Kaban Parlimen Batang Sadong, Rodiyah Sapiee sereta Kaban Kunsil Nengeri (ADUN) Simunjan, Awla Dris. – TVS
