KUCHING, 2 Jan: Berengkah bulan Januari tu, program ‘Pagi Nadai Kerita’ deka diatur dua kali sebulan dibanding semina kena Hari Minggu keterubah aja sebedau tu.
Kaunsil Mengeri Besai Kuching Utara (DBKU) nengah penerang ke dibantai ba Facebook rasmi iya madah, program tu deka diatur ninting Hari Minggu ba minggu keterubah enggau minggu ketiga ninting bulan.
“Tu (Pagi Nadai Kerita betuju ngurangka asap karbon dioksida ba mengeri besai kelimpah nyadi palan endur berandau entara peranak ke diau ba mengeri ngelantang ati sereta nyaga rampa menua,” ku penerang nya.
Kena Hari Minggu tu tadi, program mungkal taun baru 2023 tu nerima timbal ke chukup manah.
Program nya diatur ba jalai raya ke ngelinggi Padang Merdeka, ditu.
“Bemacham aktiviti bepengerai diatur baka belanda, ngayuhka ensikal, bejalai, pekit main bol enggau ke bukai,” ku iya. – TVS
