KUCHING, 29 Dis: Pengelantang anak mit terus nyadi entara pekara ti dikemeratka perintah menua tu.
Beduduk enggau nya, sebuah opis tauka institusyen ungkup anak mit patut ditumbuhka ba menua tu dikena ngintu pengelantang enggau pekara ke diguna raban nya.
Ku Menteri Pemansang Orang Indu, Ruang Bilik enggau Komuniti, Dato Sri Nancy Shukri, perambu numbuhka opis tauka institusyen khas nya udah dibai ba renggat aum Kabinet.
“Perambu nya digaga berindik ari institusyen ke udah bisi kemaya hari tu semina meratika ngagai mayuh macham renggat umur, tang nadai opis khas ungkup anak mit.
“Semua pegawai kitai diatu benung ba dalam proses meratika sekeda pekara tu ngambika bisi opis tauka institusyen khas ungkup anak mit aja ditumbuhka. Chara tu ngemudahka kitai ngintu pengelantang anak mit. Sebedau tu, ukai kitai enda meri perati laban siti seksyen aja ba dalam Opis Pengelantang Komuniti (JKM) lalu tu enda chukup,” ku iya rambau ditanya pemberita pengudah nemuai ngagai Mamacare ba Palan Transformasyen Mengeri (UTC) di Kuching lebuh Hari Empat.
Beduduk enggau nya, Nancy nerang, naka ke diatu, bisi siti unit tauka seksyen ba dalam Opis Pengelantang Komuniti (JKM) ti nyaga pekara ti ngaul pengelantang anak mit ba menua tu.
Taja pia, penyampau nya enda setipak enggau pemayuh anak mit ke manggai 9.7 juta iku ke dijaga pegawai ba opis nya.
Nya entara kebuah, opis menteri iya ngelaluka timbal penemu ari semua orang, tebal agi ari ejensi tauka Gerempung ukai Dikuasa Perintah (NGO) enggau ejensi profesional bukai ba pengawa ngelangkar pelin sekalika numbuhka opis tauka institusyen khas anak mit nya.
“Kami sigi ngelaluka timbal penemu, langgur ari orang bukai ke ulih mantu meri pemutus ke pemadu manah sereta kitai deka ngemujurka langgur nya sereta aku udah mai pekara tu ba dalam aum kabinet sebedau tu,” ku iya.
Bepelasarka rikod, bisi kira-kira enam opis menteri ke bisi diberi tangungpengawa ngintu pengelantang anak mit ba menua tu.
Taja pia, nadai opis tauka institusyen khas ti semina mekuhka pengawa nyaga pengelantang anak mit ditumbuhka ba dalam semua opis menteri nya.
“Pekara tu ngujungka bisi sekeda pekara ke enda lanchar dipejalaika ba pengawa ngatur sereta ngintu pengelantang anak mit,” tandu Nancy. – TVS
