KUCHING, 24 Dis: Perintah Sarawak deka terus ransing ngemansangka rayat enggau nengeri tu nengah pengawa ngemanah agi infrastruktur, jalai raya, internet, nambahka orang gawa enggau ngerembaika penau.
Premier Sarawak, Datuk Patinggi Tan Sri Abang Johari Tun Openg madah pekara nya entara atur dikena nyungkak ekonomi ngagai tikas ke lebih tinggi seriris enggau peminta dunya kemaya hari.
“Kami (perintah nengeri) ukai semina nguji ngemansangka infrastruktur dalam nengeri aja tang mega deka besambung nengah langit (bilun) enggau wilayah bukai dikena ngemuntang ke pejalai temuai enggau orang dagang.
“Beduduk ari nya, kami udah numbuhka serikat penerebai bilun butik nengeri ungkup tuju tu lalu pekara bekaul enggau untung ukai nyadi juluk kami,” ku iya nengah Pesan Krismas enggau Taun Baru ke dibantai Hari Enam.
Nangkan ke nya, Abang Johari madah Perintah Sarawak deka nguna manah pemisi pengeraja asal dikena mungkal pengawa nyadi menua ke beresi nadai karbon.
Semua atur nya ku iya, udah dirintaika Perintah Gabungan Parti Sarawak (GPS) dalam Pelin Pemansang Strategik Pasca Covid-19 2030 (PCDS 2030).
Berebak enggau nya, Premier madah perintah nengeri mega deka terus chakah nambahka asil penatai pemisi nengeri ke udah manggai RM11 bilion.
“Penyampau tu entara ke pemadu besai dalam sejarah Sarawak.
“Perintah mega benung numbuhka turu perintah kediri dikena nyimpan enggau beranak puku ungkup rayat Sarawak jemah ila.
“Undang-undang penumbuh turu tu udah dikemendar ba aum Kunsil Nengeri (DUN) enti nitih diteritka taun 2024 nengah puku RM8 bilion,” ku tandu iya.
Nya alai, ku Premier Sarawak belanja tu ukai semina deka nyadi penabat rayat Sarawak maya tusah tang mega ulih nyendiaka belanja belajar pechuma ngagai rayat Sarawak jemah.-TVS
