KUCHING, 10 Dis: Pengawa nyiri Sapit Menteri endang pemutus bepelasarka prerogatif ari Menteri Besai, Datuk Seri Anwar Ibrahim, ku Pemikir Politik, Dr Nur Aida Kipli.
“Aku andal pengawa nyiri tu udah diperunding enggau silik sereta beratika bemacham pekara ti ngemeratka pengasi dalam ngemujurka bemacham agenda nasional.
“Servis ngagai rayat patut dikemerat. Pengawa nyiri tu deka diperati nyadi penyikap ngagai rintai penuh penumbuh Perintah Penyerakup,” ku iya madah ngagai TVS.
Ku iya mega, kerejasama tegap entara Menteri enggau Sapit Menteri ba sesebengkah opis menteri patut dikemeran ngambika langgur enggau kuing tuju opis menteri nya deka dibuka enggau manah.
“Pengawa mantai servis efisyen enggau lurus patut dikemeran dikena nyeliahka penyaru runding enggau bebalut (mismanage) atur pengawa,” ku iya.
Berebak enggau nya, iya ngarapka pengawa nyiri deka ulih negapka agi integrasyen enggau penyerakup nasional dalam menua ngambika penegap sosio-politik ulih dijapai, sereta ulih ngerandang pemansang enggau pemujur ekonomi menua. – TVS
