MIRI, 11 Dis: Turu Pemuntangchara Pesaka, Seni enggau Main Asal Sarawak udah dipenyadi bulan April tu tadi dikena ngintu sektor pesaka, seni enggau main asal Sarawak pengudah pandemik.
Nya mega dikena melanja ngagai sebarang gerempung bansa di Sarawak lebuh ngatur aktiviti ke ngaul pengawa seni, pesaka enggau main asal.
Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting madah, opis menteri iya nyaran ngagai lima pekara iya nya main asal, pengawa bejalai, rampa menua, pemakai eggau pengerami dikena ngelakuka Sarawak.
“Dalam opis menteri kitai, kitai seruran ngelakuka lima pekara, C.A.N.F.F di Sarawak, enggau C ungkup bemacham main asal (cultures). Kitai endang ngembuan mayuh main asal. A kitai bisi mayuh pengawa bejalai (adventures) di Sarawak.
“Udah tentu, N ungkup rampa menua (nature). F ungkup pemakai (food), pemakai ke bebida ari raban etnik enggau udah nya, pengerami ke chukup mayuh,” ku iya maya Pengerami Bejadika Festival Seni Budaya Sarawak di Dewan Suarah ditu, malam tadi.
Ku iya, pengawa tu ukai semina dikena ngelakuka sektor dagang temuai, tang mega ngambika mensia mayuh ulih belajar enggau lebih dalam pasal main asal raban bansa ba di Sarawak.
“Aku deka meda Opis Menteri Dagang Temuai, Industri Kreatif enggau Seni Pemerindang ulih datai begulai dikena ngelaku ukai semina dagang temuai kitai tang mega dikena ngelakuka aktiviti awak ke mayuh orang nemu main asal enggau adat pupu bansa di nengeri tu,” ku iya.
Beduduk ari nya, Gerempung China Sarawak ngempuruka 18 gerempung ari etnik ke bebida ngambi minta turu nya lalu mujur ngatur Pengerami Seni Main Asal Sarawak di Miri kena Hari Enam enggau Hari Minggu tu.
Turu Pemuntangchara Pesaka, Seni enggau Main Asal Sarawak tu ulih dipinta abis laun tengan bulan Oktober enti deka bejalaika aktiviti pesaka, seni enggau main asal ba taun ke sama, nyema bisi minta udah bulan Oktober, peminta nya deka dibai ngagai taun baru.-TVS
