LIMBANG, 9 Dis: Tuai Komuniti enggau Tuai Raban Bansa (KMKK) dipinta mutarka isu sekalika penanggul ba renggat genturung pendiau enggau enda ngira bansa, pengarap, sereta asal penatai.
Ku penerang ke dipansutka UKAS, Kaban Kunsil Nengeri (ADUN) Batu Danau Paulus Palu Ngumbang madahka chara ti nemban dikena mutarka tetiap penanggul tauka isu ngambika meretika pangan diri sereta idup beserakup iya nya tetiap iku orang patut ngembuan ulah bebasaka pangan diri sereta bebatak asur.
“Aku ngelalau tetiap Tuai Raban Bansa enggau Tuai Komuniti (KMKK) ngambika ulih bejalaika tanggungpengawa nyadi mata enggau pending raban perintah sechara proaktif enggau efektif,” ku iya.
Nangkanka nya iya madahka semangat kerejasama chukup beguna dikena nentuka pemujur enggau pemansang ba renggat genturung pendiau.
Iya bejaku munyi nya maya aum Tuai Komuniti enggau Tuai Raban Bansa Komuniti Bisaya sereta pengawa nyuaka geran Projek Mit Menua Pesisir (MRP) ba begunan Gerempung Bisaya Limbang, lebuh Hari Empat.
Ba pengerami ke sama, Paulus mega nyuaka geran ngagai 32 iku Chairman JKKK penyampau RM10,000 enggau Biro Orang Indu penyampau RM5,000 ke deka diguna ungkup aktiviti rama ba renggat genturung pendiau.
Ke sama bisi ngulu pengawa tu iya nya Tuai Komuniti Bisaya Limbang Temenggong Nicholas Boyok Pura, Pemancha Jun Sillah, Penghulu Ekit Awang enggau Penghulu Lalam Sambat. – TVS
