KUCHING, 8 Dis: Perintah Sarawak deka terus nyendiaka mayuh agi peluang bedagang enggau mantu negapka raban pedagang sereta pedaja di nengeri tu.
Berebak enggau nya, Opis Menteri Nembiak, Lumba enggau Pemansang Pedagang (MYSED) keran deka bejalaika mayuh macham program ke ngaul pengawa nyadi orang dagang dikena negapka pedagang Sarawak.
Ambika chunto, nyengkaum kerejasama begulai enggau 14 Institusyen Pelajar Tinggi (IPT) Perintah enggau Peribit dikena bejalaika enggau ngemujurka program pemansang pedagang taun baru.
Sapit Menteri Nembiak, Lumba enggau Pemansang Pedagang, Dr Ripin Lamat madah, naka ke diatu MYSED udah mantu bedajaka pengawa nyadi orang dagang ke ngaul raban nembiak nengah mayuh macham program ke udah dilangkar enggau diperambu.
Ku iya, program nya mega dipejalaika begulai enggau Opis Menteri Dagang Entarabansa, Industri enggau Meranak Puku (MINTRED) enggau Gerempung Pemansang Ekonomi Sarawak (SEDC).
“Ungkup program taun 2023 kitai bisi merambu sekeda program begulai enggau MINTRED, SEDC sereta semua IPT ke bekaul laban kitai nyendiaka program ke sama enggau mesti bisi kerejasama.
“Nengah chara tu, semua ke diperambu ba tetiap Program Pemansang Nyadi Orang Dagang ba IPTA enggau IPTS sereta juluk MYSED iya nya seriris ngambika kitai ulih nyapai saran ti udah dilanggur ungkup pemansang pedagang, lebih agi ba nengeri Sarawak,” ku iya rambau aum media pengudah bechairmanka aum entara MYSED , IPTA enggau IPTS ba Kuching lebuh Hari Tiga.
Tuju aum nya diatur dikena ngulihka penerang enggau timbal penemu senentang program nyadi orang dagang ba renggat IPT.
Dr Ripin ke mega Kaban Kunsil Nengeri (ADUN) Lambir nerang, taja pan IPT ngembuan program khas ba dalam pemansang pedagang nembiak, tang nya dipeda ulih diranchakka sereta lebih aktif ti ngaul MYSED, lebih agi nengah program ke deka diatur udah nya.
