KUCHING, 8 Dis: Siku lelaki ke lunggar umur bebadi nyawa ketegal penyakit Rabies kena 5 Disember ba Sepital Sibu.
Direktor Pengerai Sarawak, Dr Ooi Choo Huck madah, lelaki nya ti beumur 60 taun diripotka dirampit rabies nengah asil peresa makmal enggau didiagnosis rabies encephalitis.
Berindik ari kes pemadu baru nya, Opis Pengerai Nengeri Sarawak ngerikodka 11 kes pemati ketegal rabies enggau 14 kes rabies ke ngaul mensia naka 6 Disember.
Nengah siti penerang media kemari, Dr Ooi nerang, tudah ke bebadi nyawa nya sebedau tu bisi ngayanka kelai dirampit penyakit rabies ba pun ari 26 November 2022.
Tudah mega bisi berubat ngagai klinik pengerai kena 1 Disember 2022 lebuh kelai iya sakit majak balat ti nyerangkung tusah deka nelan pemakai sereta ngirup ai.
“Tudah dibai ke Sepital Sibu ngambika diperubat. Tudah dipadahka nadai sejarah kala diketup tauka dikeramak ukui.
“Taja pia, tudah kala megai bangkai ukui kena bulan Oktober 2022. Status rabies ukui nya enda ulih diterangka,” ku iya.
Berebak ari nya, Opis Pengerai Nengeri Sarawak ngelalau mensia mayuh ngambika terus ngeripot ngagai Opis Servis Veterinar (DVS) Sarawak enti sema jelu ke ditupi sida berubah ulah tauka pendiau sekalika nyau siga tauka jenuh sereta anang nangkap, negu tauka munuh jelu nya.
Mensia mayuh mega ditangkan anang megai jelu siga ke nyengkaum ukui enggau mayau sekalika agi idup tauka udah mati.
“Ripot terus ngagai DVS Sarawak ngambika sida ulih bejalaika pengawa tasat ke silik,” tandu iya.
Opis Pengerai mega ngelalau mensia mayuh nentuka ukui sida dibai betuchuk vaksin anti-rabies ninting taun dikena nyeliahka dirampit virus rabies.
Tuchuk vaksin rabies ba ukui ulih nyeliahka mensia ari dirampit penyakit rabies.
“JKN Sarawak deka terus bebendar nentuka abi tauka telih diketup ukui enggau pengawa meri vaksin anti-rabies ngagai komuniti ke tebunsa mudah dijapai,” ku iya madah agi. – TVS
