KUCHING, 30 Nov: Perintah Sarawak diatu benung dalam proses netapka atur enggau nguna sereta tusun pengawa minta sebedau ngemendarka ubah reti jaku ‘asal’.
Menteri ba Opis Premier Datuk John Sikie Tayai madah munyi nya maya nyaut tanya ari ADUN Ba’Kelalan Baru Bian pasal pengelubah ubah gazet ngagai reti asal maya sesi betalat ungkup bacha kedua kali Rang Undang-Undang Perbekalan (2023) ba Aum Kunsil Nengeri (DUN) Sarawak ditu, Hari Dua.
Iya mega madah, pengawa ngatur gazet nya semina ulih diterit maya atur enggau guna iya udah disikap.
“Naka ke sehari tu, perintah benung ba proses ngaga penetap atur enggau guna sereta chara ngaga peminta ngakau nyadi peranak asal Sarawak.
“Udah nya, atur enggau chara tusun pengawa nya deka dibantaika ngagai Kaunsil Aum Perintah Nengeri (MKKN) enggau naka pengelengkas,” ku terang iya. -TVS
