KUCHING, 23 Nov: Sempekat Pengatur Komersial (CSA) deka ngemendarka perintah Sarawak nyaga semua aktiviti ngerudi minyak ba tebing pantai Sarawak enggau ngemansutka pemendar enggau lisin ngiga minyak ungkup Petroleum Sarawak (PETROS).
Atur nya, ku Sapit Menteri ba Opis Premier Sarawak (Undang-Undang, MA63 enggau Kaul Sarawak-Perintah Besai) Datuk Sharifah Hasidah Sayeed Aman Ghazali, bekaul CSA ke ngundan pekara resia ti ngikat enggau nagang perintah Sarawak mantaika sebarang pekat ke udah ditanggam.
“Tu tu deka dikeamat nengah ‘Rangka Kerja Perundingan’ ti diarika raban pemesai ari perintah Sarawak, Petroliam Nasional Berhad (PETRONAS) enggau PETROS.
“Pengudah CSA disain, Perintah Sarawak deka nyaga semua (aktiviti ngerudi minyak ba tebing pantai Sarawak enggau mansutka pemendar ngerudi enggau lisin ngiga minyak minyak) ngagai PETROS,” ku iya.
Sharifah Hasidah ke mega Kaban Kunsil Nengeri (ADUN) Samariang madah munyi nya maya nyaut tanya ADUN Batu Lintang See Chee How ba Aum Kunsil Nengeri (DUN) Sarawak, sehari tu.
Nangkanka ke nya, iya mega madah CSA mega deka nyadi malin ngagai Sarawak mansutka asil ari minyak enggau gas ke ditemu sereta dikeluarka dalam nengeri tu.
Sharifah Hasidah madah CSA mega mungkur penyereta ke lebih besai ari serikat dipenggi peranak menua dalam industri minyak enggau gas mungkur ba sektor kilang enggau pemungkal dalam ngulihka bekal gas ke cgukup dikena nyukung ‘Pelan Induk Gas Negara.’
“Peluang tu nadai disedia ngagai Sarawak enggau PETROS sebedau CSA disain,” ku iya seraya madah sebedau tu PETROS enggau PETRONAS udah nyain Sempekat Pemereti Ati (MoU).
Kenu ku iya, MoU nya deka nyendiaka 1,200 kaki padu standard gas sehari (MMscfd) gas tulin manggai taun 2030 dikena nyukung industri domestik, baik nya dalam sektor energi enggau ukai energi ngagai Sarawak.
Tandu iya mega, PETROS udah dikemendar ngulihka pemaik ekuiti ba sekeda kandang tebing pantai dibaruh Kunterik Bekunsi Petroleum ungkup sitak ke digiga baru ‘bisi pemaik’ ti dibuka ngagai PETROS.
Berebak enggau nya, Sharifah Hasidah madah PETROS nyadi agregator gas ti nyendiaka bekal ngagai industri di Miri enggau Bintulu.
“Kelimpah ari nya, PETROS mega bebendar nuju juluk nyadi pengidar tunggal Gas Petroleum Basah (LPG) ba serata nengeri tu,” ku iya. -TVS
