KUCHING, 23 Nov: Rayat pupu bansa ba menua tu dilalau terus besaup negutka kaul enggau ngetanka penyerakup enggau pangan diri dikena nyamin pengelikun menua.
Penyanding Penemu Pansik Sains Sarawak Datuk Patinggi Tan Sri (Dr) Alfred Jabu Numpang madah, iya berasai gaga ati laban tuai perintah, pengari rayat enggau rayat pupu bansa semampai ngemeratka penyerakup enggau seruran sepenemu.
“Ambika chunto tuai kitai, Premier Sarawak Datuk Patinggi Tan Sri Abang Johari Tun openg endang siku tuai ke mendingka jaku tuai dulu suba, enda bechiping, bebasaka semua bansa, pengarap, enggau adat asal rayat.
“Mayuh pengawa enggau program ti dipejalaika dikena ngintu enggau negapka semua pekara nya. Kitai bisi Majlis Adat Istiadat, Unit Ungkup Pekara Bukai (UNIFOR) ke meri bantu ngagai pengarap bukai ngambika rayat Sarawak bibas mekuhka pengarap diri,”ku iya rambau program randau Malaysia Decides ti dikeluarka TVS, empai lama ke udah.
Jabu mega madah, kenyau ari taun 1988 semua pupu bansa di nengeri tu diperansang ngatur program ‘Cultural Symposium’ ninting lima taun sekali betuju meri jaku lalau enggau sanding penemu ngagai perintah bekaul enggau chara dikena ngetanka budaya sereta ngiga chara ke pemadu nemban neduhka laya nyema bisi nyadi sebarang laya entara rayat.
“Kitai ulih meda enti rayat belaya, charut enggau enda sepenemu tentu mai pengerugi ngagai siti-siti menua, ulah nya nadai mai peguntung.
“Taja pia, kitai ba menua Malaysia, tebal agi ba Sarawak rayat kitai enda belaya enggau naka ulih nyeliahka pekara tu laban ulih ngeruga pengelikun sereta pengelantang mensia mayuh,” ku iya.
Kelimpah ari nya, ku iya, pekara enggau pemereti ati senentang penyerakup mesti diterenak ba genap iku nembiak kenyau ari biak awakka sida nemu pemesai reti penyerakup ungkup pemaik rayat enggau menua.
“Kitai ba Sarawak chukup betuah laban diiring enggau diembing tuai perintah baka Abang Jo enggau kabinet nengeri ke ngembuan ulah ke manah, beintegriti sereta ngemeratka pengelantang semua rayat enda ngira asal penatai enggau renggat umur,” ku iya. – TVS
