KUCHING, 21 Nov: Perintah Sarawak terus meri perati senentang pengelantang rayat ba nengeri tu.
Beduduk ari nya, Premier Sarawak, Datuk Patinggi Tan Sri Abang Johari Tun Openg mantaika Bajet Nengeri penyampau RM10.797 bilion ungkup taun 2023 sehari tu tadi.
Ku iya, perintah Sarawak diatu benung mekuhka pengawa mantu ngelempungka tating belanja rayat ke tebunsa ketegal empas pandemik COVID-19.
Ari penyampau nya, RM3.997 bilion dikena bejalaika pengawa operasyen, seraya RM6.8 bilion dikena Ungkup Akaun Turu Pemansang dikena bejalaika mayuh macham program enggau projek pemansang di serata nengeri tu.
“RM938 juta tauka 24 peratus ungkup guna emolumen orang ke gawa enggau RM1.508 bilion tauka 38 peratus ungkup bekal sereta servis.
“RM1.343 bilion tauka 34 peratus ungkup geran enggau bayar tetap; ti nyerangkung geran operasyen ngagai Opis Setengan Perintah enggau Opis Kaunsil Kandang Menua, mayar utang mensia mayuh enggau bayar bonus, pinchin, sekularship sereta bantu duit enggau pengelantang,” ku iya rambau mantaika Pekara Agih Belanja enggau Ekonomi Baru ke ngaul RUU Perbekalan (2023) 2022 ungkup Penggal Keterubah Aum Kunsil Nengeri (DUN) Sarawak Ke-19 ba Begunan DUN Sarawak ditu, pagi tadi
Abang Johari ke mega Menteri Pekara Wang enggau Ekonomi baru madah, penyampau RM90 juta dikemendarka ungkup asil reta sereta RM118 juta dikena nangkup belanja pengawa ngatur ke bukai. – TVS
