KUCHING, 20 Nov: Pemujur Datuk Seri Doris Sophia Brodie ngerampas penuduk Parlimen Sri Aman ngujungka iya nyadi Kaban Kaban Parlimen indu bansa Dayak keterubah nyari pengari rayat ba Parlimen.
Ba Pengawa Bepilih Besai Ke-15 (PRU-15) tu tadi, Doris mujur ngalahka tiga chalun nengah penyampau undi 14,131 undi jauh ngalahka penyandang sebedau tu Datuk Masir Kujat ti bediri nengah tikit bibas semina bulih 5,673 undi.
Ba penerang video iya ke dipandang nengah Facebook kemari, Doris meri terima kasih ngagai pengundi ba Parlimen Sri Aman laban udah nyukung enggau arapka iya ngiring Sri Aman terus ngulihka pemansang.
“Udah tu, aku deka terus bekerejasama enggau rayat ngiga jalai ke pemadu manah enggau betul dikena ngemansangka sitak Sri Aman.
“Aku ngarapka sitak Parlimen Sri Aman tu ila terus angkat mansang enggau maju manggai taun 2030,” ku iya.
Beduduk ari nya, iya meri terima kasih ngagai tiga Kaban Kunsil Nengeri (ADUN) ba sitak nya laban udah meri sukung ngagai iya ngelama tu.
Ba PRU-15 tu tadi, Doris mega disatup chalun PSB, Wilson Entabang ke bulih sepenyampau 10,902 iti undi ditangkan chalun PH Naga Libau @Tay (2,021 iti undi).-TVS
