KUCHING : “Aku enda ngasaika tu menang nasip, taja majoriti menang ke ke diulih aku mit,” ku Kaban Parlimen Lubok Antu ke baru Roy Angau Gingkoi.
Nangkanka ke nya, iya madah enti diperati ari sukut positif iya andal pengundi di Lubok Antu deka meda ubah pemansang.
“Baka ke udah disebut aku dalam manifesto sebedau tu, aku deka ngemeratka pemansang infrastruktur ba sitak tu laban kitai meda mayuh projek beguna dikinsil sebedau tu, nya alai aku deka bebendar ngaduka pekara tu,” ku iya madah ngagai pemberita TVS maya dirandau ba laman Palan Aum Borneo Kuching, malam tadi.
Dulu ari nya, ba Pengawa Bepilih Besai Ke-15 ngemataka Roy semina menang majoriti 100 iti undi. Entara undi ke pemadu mit ba serata Malaysia.
Iya bulih penyampau semua undi 6,644 iti undi ngalahka chalun Parti Sarawak Bersatu (PSB) Johnical Rayong Ngipa ke bulih 6,544, ditangkan chalun Perikatan Nasional (PN) Jugah Muyang (5,360) enggau chalun Pakatan Harapan (PH) Langga Lias ke semina bulih 746 iti undi. -TVS
