TATAU, 18 Nov: Pemansang ba menua pesisir terus nyadi entara pekara ti diberi perati perintah Gabungan Parti Sarawak (GPS) dikena nyamin pengelantang rayat di serata nengeri tu.
Nampung berita Unit Komunikasi Awam Sarawak (UKAS), Premier Sarawak, Datuk Patinggi Tan Sri Abang Johari Tun Openg madah, agi mayuh pengawa ke deka dipejalaika perintah dikena nyapai juluk nya.
“Ambika chunto, bekal karan, bekal ai, jalai alun enggau internet udah bisi, tang apin chukup.
“Kenyau ari lima taun ke udah, perintah Sarawak udah ngungkupka mayuh belanja dikena nyendiaka bekal ai enggau bekal karan ba serata nengeri,” ku Abang Johari madah nengah teks jaku iya ti dibacha Menteri ba Opis Premier Sarawak, Datuk John Sikie Tayai rambau Program Sarawakku Sayang 2022 di Dewan Sukan Tatau, sehari tu tadi.
Beduduk ari nya, iya madah, perintah GPS bisi daya nyendiaka agih belanja dikena ngerembaika pemansang laban asil ekonomi majak nambah pengudah Chukai Jual Nengeri (SST) dipejalaika ungkup produk petroleum.
“Kelimpah ari nya, Sarawak mega bisi duit turu ari Bank Pemansang Sarawak (DBOS) ti tau mantu ngelengkaska pemansang infrastrakcha ba serata nengeri tu.
“Ambika chunto, kandang menua Ulu Rajang ba baruh Ejensi Pemansang Ulu Rajang (URDA) ke udah diberi ungkup penyampau RM1.5 bilion dikena ngaga jalai alun sereta perengkaguna ke bukai ti meri pemaik ngagai rayat,” ku iya.
Rambau Pengawa Bepilih Besai Ke-15 (PRU-15) serak tu, Manifesto GPS, pugu ti ketujuh madahka perintah GPS deka ngerembaika bungkur enggau kualiti bekal ai, karan, tiang pemanchar sereta servis internet.
Perengkaguna pemun enggau telekomunikasyen deka dikerembai mungkur semua kandang menua ba Sarawak ti tau nyungkak kualiti pengidup seraya nginsur pemansang bukai nyerangkung ari sukut pelajar, ekonomi sereta rama.
Ba pengerembai bukai, nengah teks jaku nya, Abang Johari ke mega Chairman GPS nerangka, pemujur GPS menang 76 kerusi Kunsil Nengeri (DUN) ari 82 kerusi rambau Pengawa Bepilih Nengeri Ke-12 (PRN-12) ke udah mandangka sukung sereta pengandal rayat ngagai GPS ngatur nengeri tu.
Temuai bukai ke bisi ngulu program nya, Residen Bagi Menua Bintulu, Datu Jack Aman Luat, Pegawai Pelilih Tatau, Jabang Juntan, Senator Dato Dr. Nuing Jeluing, Sekretari Mendam Opis Menteri Perengka Pengangkut Sarawak, Dato Ir. Alice Jawan Empaling sereta bini Datuk John Sikie, Datin Melia Gelen.
