KUCHING : Undi ungkup Gabungan Parti Sarawak (GPS) iya nya undi ungkup Sarawak dikena nentuka pengidup kitai enggau pengidup anak uchu kitai jemah ila menyana agi.
Nya alai, aram mih kitai sama-sama ngayanka pengasih enggau penyayau ke menua kitai Sarawak, ku Chairman GPS Datuk Patinggi Tan Sri Abang Johari Tun Openg nengah sebengkah surat ke diayanka sehari tu tadi.
“Aku sekali enggau ati baruh minta sukung kita, undi mih GPS baka ba PRN-12, Disember suba,” ku iya.
Nangkanka nya, iya ke mega Premier Sarawak madah perintah GPS udah mujur bejalaika 120 iti polisi enggau inisiatif nyengkaum bantu ngelempungka penyuntuk belanja ti nating rayat maya dituntung penyakit Covid-19.
“Nulung rayat mutarka penusah ke baka tu, nya pekara ke ti amat dikemeratka perintah GPS kelimpah ari nulung semua kitai ari sukut pengerai, ekonomi enggau batang pengawa. Rayat seruran ba ati perintah GPS,” ku tandu iya.
Berebak enggau nya, iya madah perintah GPS deka meruan siru enggau betatika nasip raban B40, M40, raban nembiak, nembiak sekula, pengereja pengawa, pedagang, orang lunggar umur, OKU, orang gawa perintah, pia mega genap ruang bilik enggau semua rayat enda ngira bansa enggau jalai pengarap.
“Tu semaya enggau pengangkun kami ba GPS. GPS ngembuan rikod ngaduka pengawa ti chukup manah lalu udah mandangka pengidup diri bejalaika pengawa megai enggau ngemansangka Sarawak,” ku iya.
Beduduk ari nya, pagila 19 November 2022 kita ngaga pemutus ke chukup besai amat reti.
“Sarawak maju sereta tampak rita jemah ila bepanggai bendar ba tunjuk jari semua kita.
“Semina pemujur besai ba PRU-15 ulih nentuka Sarawak terus kering mantaika jaku enggau penemu ba Parlimen dikena ngetan sereta mulaika ungkup Sarawak.
“GPS ukai semina mutus ati tang amat bebendar deka negika menua tu nitihka juluk ati enggau peminta rayat Sarawak,” ku iya. -TVS
