KUCHING, 17 Nov: Bala pengundi ke nurun ngundi kena 19 November (Hari Enam) tu dilalau patut bejalaika tanggungpengawa diri nyadi pengundi enggau runding ke rasional lalu anang nitihka pengasai ati.
Pemikir politik ke mega penglicha ari Dekan Fakulti Sains Sosial dan Kemanusiaan Universiti Malaysia Sarawak (UNIMAS), Prof. Dr. Neilson Ilan Mersat madah, pekara tu beguna ngambika sida ulih ngaga pemutus milih chalun pengari rayat ke ulih dikearap mai pemansang.
“Ambika chunto, nembiak 18 taun ke atas mesti nguna manah peluang ngundi ti diberi ngagai sida sereta anang terunda nitihka pengasai ati diri ke agi biak umur lebuh ngundi, lebih agi tu keterubah sida nurun ngundi,” ku iya rambau dirandau pematak randau TVS ba dalam program Malaysia Decides lebuh Hari Tiga.
Beduduk ari nya, Dr Nielson nerangka, nyema siku-siku orang nya ngundi nitihka pengasai ati ke enda manah ulih ngasuh sida salah singkang meri undi ngagai chalun ke ukai baka dikedeka tauka dipinta.
“Nya alai, lebuh nurun ngundi, kitai mesti udah nemu sapa chalun ke patut disukung maya hari enam (19 November) tu.
“Pengundi mesti ngembuan runding ti rasional ngambika ulih ngaga pemutus ke nemban, milih pengari rayat ke betul ungkup pemaik semua dudi hari,” ku iya.
Kelimpah ari nya, iya ngelalau genap iku rayat pupu bansa mesti naka ulih nyaga pengelikun, penyerakup enggau penegap politik menua.
“Semua pekara tu chukup beguna lebuh kitai milih perintah. Ti nyema menua likun reti nya bisi perintah ke manah nyaga.
“Kitai mesti besaup ngetanka semua pekara nya laban ukai muntang deka ngulihka pengelikun menua ke diasaika kitai kemaya tu. Mayuh pemar, penanggul ke ditapi sida ke tuai dulu kelia sereta kitai rebak dudi mesti seruran ingatka jasa sida,” ku iya.
Pia mega iya madah, pengelikun menua mega entara penteba ke ulih matak pemeranak puku ari menua luar datai seraya mantu ngemansangka menua tu ba mayuh macham bidang enggau sektor.
“Menua luar seruran beratika gaya politik enggau pengelikun ba sesebengkah menua sebedau ngaga pemutus meranakka puku laban sida enggai napi pengerugi,” ku iya.
Komiti Pengawa Bepilih (SPR) netapka hari bulan ngundi rambau PRU-15 tu iya nya kena 19 November tu. – TVS
