KUCHING, 17 Nov: Premier Sarawak Datuk Patinggi Tan Sri Abang Johari Tun Openg udah ngemendarka ungkup sepenyampau RM350 juta, dikena ngaga sistem sapat bah ba Skim Pengentap Baru Stampin.
Iya mansutka pekara nya rambau ngulu program licha ungkup chalun GPS P.195 Bandar Kuching enggau P.196 Stampin.
“Ba Stampin ditu, penusah bah suah nyadi laban tanah ditu iya nya tanah kerapa, tang Kaban Parlimen Stampin sebedau tu enda kala mutarka penusah tu, iya semina meda aja.
“Serak tu, Kaban Kunsil Nengeri (ADUN) Kota Sentosa, Wilfred Yap deka mutarka penusah tu. Pengudah dikira aku, kitai agi bisi belanja ke chukup. Nyadi kitai deka bejalaika sistem tu begulai enggau Opis Entali Ai enggau Parit,” ku iya.
Iya nerang, enti sema sitak Bandar Kuching enggau Stampin ulih dirampas baru ari parti penyakal, pengari rayat ari GPS endang bekenanas deka ngemansangka kedua-dua sitak Parlimen tu.
Abang Johari madah, siku-siku orang ke nyadi pengari rayat, mesti ngamatka danji, lalu iya empu ke nyadi Premier Sarawak udah ngamatka danji numbuhka Turu Pesaka Bansa (Sovereign Fund) di Sarawak.
“Rambau Pengawa Bepilih Besai Sarawak empai lama ke udah, ba dalam manifesto, aku bedanji deka numbuhka Turu Pesaka Bansa ungkup pengidup rayat ke lebih menyana dudi hari.
“Ba aum Kunsil Nengeri (DUN) minggu baru, aku deka mantaika bil nya,” ku iya madah agi.
Temuai bukai ke bisi ngulu program licha nya nyerangkung Presiden SUPP Dato Sri Dr Sim Kui Hian, ADUN Kota Sentosa Wilfred Yap, Datuk Bandar MBKS Dato Wee Hong Seng, chalun GPS Ba Parlimen Bandar Kuching Eric Tay sereta Stampin Lo Khere Chiang.-TVS
