KUCHING, 16 Nov: Sarawak minta perintah besai ngaku Opis Kereja Raya (JKR), Opis Bekal Ai Menua Pesisir (JBALB) sereta Opis Entali Ai enggau Parit (DID) nyadi opis teknikal.
Premier Sarawak Datuk Patinggi Tan Sri Abang Johari Tun Openg madah, pekara nya endang beguna dikena nentuka tiga opis ba baruh perintah Sarawak nya ulih bejalaika semua projek perintah besai ke bisi ba nengeri tu.
Ku iya, Sarawak mega deka kuasa Tuai Pemegai Menua Sarawak ba pengawa nyiri Tuai Akim dipulaika baru nitihka Sempekat Malaysia 1963 (MA63).
Sebedau tu, lebuh Dato’ Sri Dr Wan Junaidi Tuanku Jaafar dipadu nyadi Menteri ba Opis Menteri Besai (Undang-undang enggau Parlimen) nengah penumbuh kabinet perintah besai ti ba baruh iring Datuk Seri Ismail Sabri Yaakob, Abang Johari minta Wan Junaidi bebendar ngubah Konstitusyen Perintah Besai.
Iya nerangka, pengawa ngubah nya mesti ngemasukka MA63 enggau Komiti Entara Perintah (IGC).
“Kitai sayauka Sarawak laban kitai mesti ngetanka hak kitai. Aku sigi ngemeratka amat senentang pekara tu,” ku iya rambau Bejadika Program Program Sarawakku Sayang di Siniawan, Bau lebuh Hari Tiga.
Entudika nya, iya madah, pengawa minta pulai baru hak ba baruh MA63 enggau IGC ke dikelaung sebedau tu entara pekara ti diberi perati Gabungan Parti Sarawak (GPS).
Nengah manifesto Pengawa Bepilih Besai Ke-15 (PRU-15), GPS madah perintah Sarawak udah mujur ngambi pulai 13 Pekara pengatur bekaul hak Sarawak ari perintah besai.
Pekara nya nyerangkung langgur projek pemansang perintah besai, pangku pengawa pekereja perintah renggat perintah besai, penama nembiak Sarawak ke universiti perintah sereta negapka pengawa enggau kerejasama opis nengeri enggau perintah besai di Sarawak.
Sama bisi datai ngulu program nya, chalun GPS Parlimen Puncak Borneo, Datuk Willie Mongin, Menteri Pelajar, Inovasyen enggau Pemansang Pengelandik Sarawak, Datuk Roland Sagah Wee Inn, Sapit Menteri Perengka Pengangkut Sarawak, Datuk Dr Jerip Susil, Sapit Menteri Perengka Pengagkut II Sarawak Dato Henry Harry Jinep sereta Tuai Raban Nembiak Parti Pesaka Bumiputera Bersatu (PBB) Miro Simuh. – TVS
