KUCHING, 16 Nov: Kaunsil Pengempung enggau Pengintu Tanah Sarawak (SALCRA) bisi bejalaika sekeda program dikena meri peluang ngagai nembiak tauka siku-siku orang ke bisi pengingin ati deka gawa ba ladang.
Menijar Besai SALCRA, Joseph Blandoi madah program nya berengkah dipejalaika kenyau ari menua ba baruh Atur Mindah Betagang (PKP) ketegal pengerekai COVID-19 sebedau tu.
“Siti ari program nya dikumbai Program Pedagang Betanam Betupi Menua Pesisir. Program tu lebih ngagai raban kunteriktor Kelas F. Nyadi, kitai ngarapka bisi nembiak ke deka ngaul diri ba program tu nengah chara ke mit dulu.
“Pengawa tu ngaul ungkus penyampau RM20,000, kitai meri peluang gawa. Udah abis nya kitai nampung baru. Tu siti ari chara dikena kitai matak nembiak ke deka bedagang enggau gawa ba ladang,” ku iya rambau dirandau pematak randau TVS lebuh Hari Satu.
Nangkanka nya ku iya madah naka ke diatu bisi 79 iku kunteriktor Kelas F gawa ba baruh SALCRA sereta nengah program nya naka bulan Oktober taun tu penyampau 13 peratus sawit ulih dikeluarka ari ladang.
Ku Joseph, program ti kedua iya nya Program Pampas enggau Bonus Pekereja Ladang (CREW), ti mekuhka pengawa deka narit rayat menua tu empu gawa ba ladang SALCRA.
“Program tu chukup manah laban bisi ngaul Program Royalti. Keterubah nyain kunteriktor pengelama dua taun. Udah nya enti pengawa nya mujur, sida diberi peluang niki enggau diberi peluang belajar.
‘Enti nyema siku-siku orang nya gawa lebih ari 10 taun sida deka diberi sagu ati. Nangkanka nya, enti orang nya jauh sereta kunterik gawa sida udah abis SALCRA deka nyendiaka tambang ungkup sida pulai ke menua diri, diberi rumah endur diau, sereta anak sida ke nurun sekula bisi disediaka perengka pengangkut,” ku iya.
Ku iya madah nya entara program ke bisi disediaka SALCRA ti dipeda ngemeratka pemaik enggau pengelantang pekereja. – TVS
