BETONG, 15 Nov: Rayat lebih agi sitak Betong patut meri sukung penuh ngagai pengari ti dikeandalka ulih meri pemansang, ku chalun Gabungan Parti Sarawak (GPS) Dr Richard Rapu.
Iya madah mayuh langgur strategi udah diperambu sereta deka diteruska ungkup pengelantang rayat ke diau di sitak tu.
“Aku ngarapka semua rayat ulih nyukung parti Gabungan Parti Sarawak (GPS) iya nya sebuah parti ti diiring Premier Sarawak, Datuk Patinggi Tan Sri Abang Johari Tun Openg ke alai parti tu ngarika semua pupu raban bansa,” ku iya.
“Premier Sarawak Datuk Patinggi Tan Sri Abang Johari Tun Openg endang patut dikearapka nyadi tuai ke alai mayuh pemansang udah dibai iya sereta mayuh pelin udah diperambu ungkup pemansang Sarawak,” ku iya maya dirandau pemberita.
Nangkanka nya Dr Richard mega madahka pemujur ba Betong tu ila ulih meri siti penuduk ba Parlimen ila dikena nyukung sereta ngenyariska sada nyawa rayat Sarawak dikena ngemujurka agenda ke lebih besai dudi hari. – TVS
