SIBU, 15 Nov: Bisi 1,756 iku pegawai enggau Raban Soldadu Malaysia (ATM) melaki bini nurun ngundi ba Kem Rascom Batu 10 beserimbai enggau Pengawa Bepilih Besai Ke-15 (PRU-15).
Asil tinjau krew TVS ba Kem Rascom Batu 10, Palan Ngundi Tumu berengkah nerima penatai raban ATM urung pukul 8 pagi lebuh Hari Dua.
Bisi tiga endur ngundi disediaka SPR ke alai pengawa muai undi dibuka berangkah ari pukul 8.30 pagi enggau deka ditutup pukul 5 lemai.
Nangkanka nya, chalun Gabungan Parti Sarawak (GPS) Parlimen Sibu Clarence Ting mega bisi ngemataka proses ngundi seraya betabi jari enggau sekeda raban ATM ke bisi datai ngundi ba palan nya.
Ku Clarence Ting, iya chukup gaga ati meda raban soldadu melaki bini sama bejalaika tanggungpengawa ngundi sereta proses ngundi ba palan nya bejalai lanchar.
Bepelasarka rikod, Pengawa Bepilih Besai Ke-15 (PRU-15) Parlimen Sibu ngemataka tiga chalun besatup ke ngaul Clarence Ting Ing Horh (GPS), Oscar Ling chalun Parti Tindakan Demokratik (DAP) sereta Wong Soon Soh chalun Presiden Parti Sarawak Bersatu (PSB).
Parlimen Sibu berengkah dipetandingka ba taun 1978 enggau rambau PRU Ke-5, Presiden SUPP ke mega Sapit Kepala Menteri Sarawak ke Lama, niang Tan Sri Dr. Wong Soon Kai mujur menang ba kerusi Parlimen Sibu.
Taja pan pia, pengudah semilan kali PRU diatur, Parlimen Sibu mujur dikuasa Parti Tindakan Demokratik (DAP) ba taun 1982, 2010, 2013 nyentuk ke diatu. -TVS
