SELANGAU, 14 Nov: Jalai Besai Pan Borneo Seksyen Selangau sepanjai 27 kilometer enggau simpang beringkat diatu udah dibuka ngagai penguna.
Opis Menteri Kereja Raya nengah sebengkah penerang madah nengah ungkus projek RM588 juta, seksyen jalai besai tu deka nyadi penyungkak pemansang ngagai sitak Selangau, Mukah, Balingian enggau Sibu.
Pengawa bejadika nya dikemujurka Menteri Besai Datuk Seri Ismail Sabri Yaakob enggau Premier Sarawak Datuk Patinggi Tan Sri Abang Johari Tun Openg ditu, pagi tadi. Sama datai Menteri Kanan Kereja Raya, Dato Sri Fadillah Yusof.
Seksyen Selangau tu berengkah digaga kena 1 November 2016 lalu deka dibuka ngagai mensia mayuh berengkah sehari tu.
“Projek dibaruh agih perintah besai tu ulih mantu ngelancharka pejalai trafik ari Sibu ke Bintulu.
“Kelimpah ari nya, iya mega deka nyadi penyungkak ngagai pemansang sitak ke besemak baka Sibu, Selangau, Mukah enggau Balingian nengah akses jalai raya ke lebih manah.
“Pejalai projek tu mega nyadi kelai komitmen perintah besai dalam ngemansangka jalai raya ke udah bisi, enggau atur ke lebih menyana,” ku iya.-TVS
