KUCHING, 12 Nov: Kuasa autonomi pelajar baka ke udah dibantai dalam Sempekat Malaysia 1963 (MA63) endang patut diambi pulai baru ke pemaik rayat enggau nengeri tu dudi hari.
Presiden Gerempung Graduet Dayak Sarawak (SDGA), Sr Gary Ningkan madah, kebuah pia laban semina anak Sarawak empu lebih mereti nama penanggul ke ditapi ba bidang pelajar di nengeri tu.
“Ambika banding diatu ba Sarawak kitai betapi enggau isu sekula repuk. Lebuh kitai (Perintah Sarawak) nguji minta Perintah Besai mutarka pekara tu, sida nyau ngasuh kitai (Sarawak) mayar pulai baru (utang) 1 bilion sebedau ngemanah sekula repuk.
“Tang enti nitih tanggungpengawa ngemanah sekula repuk nya endang tanggungpengawa perintah besai,” ku iya.
Gary madah munyi nya maya dirandau TVS ba Program Malaysia Decides Iban bejuraika topik Pemesai Guna Bidang Pelajar Ngagai Pemansang Ngagai Bansa Dayak di City One, empai lama.
Nangkan ke nya, iya madah nitihka ripot berita naka bulan Julai taun tu tadi bisi 351 buah begunan sekula repuk sereta 107 enda likun ke udah diaku Opis Kereja Raya (JKR).
“Nya alai, ba penemu aku endang patut kitai ngulihka baru autonomi pelajar tu.
“Tang taja pia, aku berasai temegah ati meda utai ke chukup manah digaga sekumbang dibaruh iring Premier Sarawak Datuk Patinggi Tan Sri Abang Johari Tun Openg ti amat ngemeratka bidang pelajar baka ngatur lima buah sekula entarabansa dipejalai ba menua tu, numbuhka universiti dipenggi perintah nengeri enggau Palan Pengelati Teknikal tauka Centex.
“Kelimpah ari nya, Premier mega chukup ngemeratka pemesai guna jaku English kelimpah dudi hari ila iya kala besemaya deka meri pelajar pechuma ngagai semua anak Sarawak,” ku iya seraya madah nya kebuah kuasa autonomi enda tau enda diberi pulai baru ngagai Sarawak. -TVS
