KUCHING, 11 Nov: Perintah Sarawak dibaruh iring Gabungan Parti Sarawak (GPS) endang bisi meri peluang ngagai raban orang indu ngambi bagi ba pengawa politik lebih agi indu Dayak.
Sekretari Mendam ba Opis Menteri Perengka Pengangkut Sarawak, Dato Ir Alice Jawan Empaling, madah ambika chunto Dato Sri Doris Sophia Brodi udah diberi peluang bediri nyadi chalun ngarika GPS ba sitak Parlimen Sri Aman rambau Pengawa Bepilih Besai ke-15 (PRU-15) tu ngambika enti nyema iya menang dia iya ulih mantaika peminta rayat lebih agi raban indu Dayak.
Iya madahka, nya siti chara ti mandangka perintah Sarawak seruran meri peluang ngagai raban orang indu dalam nyaup ngemansangka rayat enggau menua tu.
“Sarakup Indu Dayak Sarawak (SIDS) mega bisi numbuhka siti Kursi Pansik Tan Sri Empiang Jabu ba Universiti Putra Malaysia (UPM) Bintulu ke ulih dikena bejalaika pansik pasal status indu Dayak lebih agi ba dunya politik sosial enggau ekonomi,” ku iya rambau dirandau ba dalam program Malaysia Decides dalam Jaku Iban lebuh Hari Empat.
Alice ke mega Chairperson SIDS nerangka, nengah asil pansik nya, strategi dikena ngemansangka orang indu ulih dipejalaika seraya nyapai saran ke udah ditetapka.//
Iya mega madah, indu kemaya hari tu sama ngembuan pemandai, pengelandik enggau pemujur baka sida ke lelaki sereta ulih dikearapka megai siti-siti pangku pengawa tauka nyadi tuai.
“Tang, enti kitai mandingka enggau sida ke lelaki nadai kurang pengelandik kitai ke indu. Kitai bepelajar, bepenemu, enggau kitai bisi penyinu, penyiru ati nulung bansa diri,” ku iya.
Ku iya madah, semua penteba nya endang mesti bisi ba siku-siku indu ngambika sida dipeda bisi daya ulih dichiri nyadi tuai sereta dipebasa.
Bepelasarka rikod, SIDS entara gerempung ke pemadu tuai di Sarawak, bisi 28 pampang di serata nengeri tu sereta lebih 14,000 iku kaban. – TVS
