KUCHING, 11 Nov: Dekan Ba Fakulti Sains Sosial Dan Kemanusiaan, di Universiti Malaysia Sarawak (UNIMAS) , Profesor Dr Neilson Ilan Mersat madah kerejasama entara orang ke lama enggau baru dalam politik ba pengawa ngatur pemansang endang chukup beguna.
Ku iya, bisi dua kategori orang ke pemadu beguna dalam bejalaika bidang politik iya nya bisi orang tuai ti ngembuan peneleba enggau bisi orang biak ti ngembuan timpai tauka pengeransing ati.
“Aku suah nyebut pekara ti dikunsika Federamos menya iya nya ku iya, dalam politik tu kitai begunaka dua iku orang iya nya orang ke tuai nya kitai begunaka pemintar sida nyadi sida ke biak nya tadi kitai begunaka visyen enggau pengeliat ati sida”, ku iya.
“Dua raban tu enda tau enda bekerejasama lalu enda tau ditejuka ngagai sida ke nembiak aja tauka ditejuka ngagai orang ke tuai aja..mesti bekerejasama nyadi siti tim.”
Iya mansutka buah penemu nya lebuh dikerandau pematak randau TVS ba program Iban Malaysia Decides bedau lama ke udah.
Ungkup penemu, Komiti Pengawa Bepilih Besai (SPR) udah netapka Pengawa Bepilih Besai ti ke-15 (PRU-15) deka diatur kena 19 November tu. – TVS
