LIMBANG, 10 Nov : Pemansang sektor betanam betupi ke meruan enggau sekuriti pemakai terus diberi perati perintah Sarawak.
Sapit Menteri Industri Pemakai, Komoditi enggau Pemansang Kandang Menua Datuk Dr Abdul Rahman Ismail madah, dikena ngemanahka sektor nya perintah udah nukar nama Opis Menteri Betanam Betupi Moden enggau Pemansang Kandang Menua sebedau tu nyadi Opis Menteri Industri Pemakai enggau Pemansang Kandang Menua (M-FICORD).
Iya empu ngaku senentang sektor betanam betupi siti ari industri ke bisi pemar ke mesti ditapi, tebal agi seriris enggau pengawa perintah ke mekuhka pemansang ekonomi Sarawak.
“Nya kebuah kitai nukar nama betanam betupi nyadi industri pemakai, kitai mega bisi komoditi ke mungkur utai tanam ke bepelasarka industri kebun bedandang besai baka sawit, getah, koko, lada enggau siti agi pemansang kandang menua iya nya dikena ngemansangka menua pesisir,” ku iya rambau ngulu Program ‘Sumbangan Beras, Berasku Berasmu’ ti diatur Gerempung Anak Bulan Mirah Pelilih (PBSM) Limbang Di Dewan Bunga Raya lebuh Hari Tiga.
Nangkanka nya, iya nerangka senentang sektor betanam betupi entara penyungkak besai asil ekonomi Sarawak ke deka dikemansangka nengah chara ngaul rayat di nengeri tu.
“Ambika banding, kitai ba Sarawak semina bisi siti opis menteri ti dibanding ba semenanjung bisi tiga opis menteri. Ba Sarawak opis menteri nya udah ditukar nama ngambika lebih meratika chara ke lebih nemban dikena mantu rayat.
“Nengah M-FICORD, kitai mesti nemu pengerembai pemadu baru sereta program-program ungkup opis menteri tu udah dipejalaika,” ku iya.
Chalun Gabungan Parti Sarawak (GPS) Parlimen Limbang Datuk Hasbi Habibollah enggau Chairman PBSM Limbang Chew Sing Liang mega bisi ngulu program ke diatur nya. – TVS
