SELANGAU, 8 Nov: Pemujur Gabungan Parti Sarawak (GPS) menang ba 31 kerusi Parlimen di nengeri tu chukup beguna dikena nentuka perintah besai ke ulih megai menua.
Menteri ba Opis Premier Sarawak, Datuk John Sikei Tayai nyemetak madah, GPS bisi kuasa nentuka sapa perintah ke ulih nyadi perintah besai pengudah Pengawa Bepilih Besai Ke-15 (PRU-15) tu.
“Kitai anang sesekali ngasuh pisang bebuah dua kali. Pemutus PRU-14 ke suba mesti nyadi teladan kitai semua ngambika enda salah milih perintah,” ku iya madah rambau ngulu Program Agriculture Community Outreach Program AgriCOP di Selangau apin lama ke udah.
John ke mega Kaban Kunsil Nengeri (ADUN) Kakus nerangka, perintah besai ke dipilih lima taun ke udah nadai mai projek pemansang ungkup pemaik enggau pengelantang rayat.
Senator Rita Sarimah Patrick, chalun GPS Parlimen Selangau, Edwin Banta, Pegawai Betanam Betupi Bagi Menua Sibu, Badin Unor, Pemanca Gerosen Jubin sereta Penghulu Lasit Bajieng enggau Nelson Chuat bela bisi datai ngulu program nya.
Sebedau tu, iya madah, siti chara ke tau dikena matak pengerindu nembiak ngaul diri ba pengawa bepilih sekalika ngundi enggau nyadi orang ke mantu ngatur pengawa ngundi iya nya mai sida ngaul diri ba pengawa nya.
“Nengah chara nya nembiak bisi pemereti ati senentang guna ngundi ba pengawa milih perintah sereta neruska pemansang sekalika ba renggat nengeri tauka perintah besai,” ku iya.
Lebuh nerangka senentang program agriCOP, John muji pengawa Opis Betanam Betupi ke udah mujur ngatur program nya ti meri penemu senentang chara nguna teknologi baru ba dalam sektor betanam betupi.
Iya madah, ambika chunto bisi kandang endur di Sungai Arip, Sungai Bawang enggau Sungai Tau, ulih dikemansangka nyadi endur bekebun laban ngembuan tanah ke besai sereta manah alai betanam. – TVS
