SIMUNJAN, 8 Nov : Perintah Sarawak ngemendarka agih belanja tambah sepenyampau RM3.85 juta dikena bejalaika projek pengelantang ke ngaul rayat di Kampung Ensengei Iban enggau enam genturung pendiau bukai.
Premier Sarawak, Datuk Patinggi Tan Sri Abang Johari Tun Openg madahka, agih nya dikena ngemanah pendiau rumah panjai di Kampung Ensengei Iban sereta ngaga jalai mit ba sekeda kandang genturung pendiau dia.
“Projek ba rumah panjai beungkus RM850 000 deka diagih seraya RM3 juta dikena bejalaika projek ba genturung pendiau.
“Beduduk ari nya, aku ngarapka dokumen ti diguna dikena bejalaika semua projek tu ulih dianjung jampat,” ku iya rambau bejaku ba Program Tuai Begulai Enggau Rayat di Kampung Tanjung Pisang kena Hari Satu tu tadi.
Sama datai ngulu program tu chalun Gabungan Parti Sarawak (GPS) Parlimen Batang Sadong, Rodiyah Sapiee enggau Kaban Kunsil Nengeri (ADUN) Simunjan, Awla Dris.
Ba pengerembai ke sama, Abang Johari ngelalau ejensi perintah nengeri seruran beratika projek pemansang rayat ti udah dikemendarka iya.
“Aku udah minta Residen nyendiaka dokumen ke diguna laban kitai enggai orang nyebut, Abang Jo udah ngemendarka belanja, tang projek nadai dipeda,” ku iya.
Sebedau tu, rambau bejaku ba program nya bisi minta ungkup tambah dikena neruska Projek Transformasyen Menua Pesisir (RTP) ke nyerangkung di Kampung Ensengei Iban. – TVS
