SRI AMAN, 8 Nov: Penyerakup enggau kerejasama ti rat entara rayat pupu bansa iya nya entara pekara besai ke ulih meri pemujur ngagai Gabungan Parti Sarawak (GPS) menang besai rambau Pengawa Bepilih Besai Ke-15 (PRU-15) tu.
Sapit Presiden Parti Pesaka Bumiputera Bersatu (PBB) Datuk Amar Douglas Uggah Embas madahka, juluk GPS ti deka menang ba semua 31 kerusi Parlimen di Sarawak mesti dijapai awakka lebih mayuh pengari rayat ari gempung nya mai sada Sarawak ba renggat parlimen.
“Kitai patut ransing bekimpin negika semua chalun ti ngarika parti komponen GPS. Premier Sarawak Datuk Patinggi Tan Sri Abang Johari Tun Openg ke mega Chairman GPS minta kitai ranchak agi bejalaika kimpin ngambika kitai ulih menang besai.
“Tu keterubah GPS betanding ba pengawa bepilih besai nguna simbol diri empu, sereta mesti nyadika pemujur kitai menang 76 ari 82 kerusi rambau Pengawa Bepilih Nengeri Ke-12 chunto tauka teladan,” ku iya madah rambau betemu enggau chairman sereta kaban komiti ari empat pampang PBB di Bagi Menua Sri Aman lebuh Hari Satu.
Uggah ke mega Sapit Premier Sarawak nerangka, pemujur GPS menang ba PRU-15 deka nentuka parti nya ba penuduk ke pemadu tegap lebih agi terus ngintu enggau ngetanka hak rayat enggau pekara ti diguna Sarawak baka ke ditanggam ba Sempekat Malaysia 1963 (MA63).
“Rayat Sarawak bisi kebuah ke tegut nyukung GPS, tebal agi Abang Johari mujur mandangka iya siku tuai ke ngembuan timpai ke jauh berundingka chara dikena nambahka asil penatai pemisi enggau duit turu nengeri tu,” ku Uggah.
Slogan GPS iya nya Duluka Sarawak ti mai reti undi ke diberi ngagai chalun GPS nandaka sukung ngagai Abang Johari.
Chairman GPS, Datuk Patinggi Abang Johari Tun Openg udah ngelancharka Manifesto GPS ti ngundan lima pekara besai, 25 pugu, 215 komitmen ti mai Sarawak mansang manggai taun 2030. – TVS
