KUALA LUMPUR, 7 NOV: Kontijen Sarawak tepantup ati enggau pengulih ke dijapai iya ba penuduk lumur dua ba pemutus penuh Lumba Para SUKMA XX MSN 2022.
Menteri Pemansang Orang Indu, Anak Mit enggau Pengelantang Komuniti, Dato Sri Fatimah Abdullah madah, Sarawak pemadu nyulut ba pemayuh midul ke dijapai ba lumba serak tu.
“Kitai semina kurang empat midul emas aja dibanding tim champion (Sabah), midul kitai lebih mayuh ari Sabah iya nya 146 iti.
“Aku temegah laban tujuh rikod baru ditempa kitai ba Sukma serak tu, kita semua bisi pengelebih,” ku iya maya Pengerami Nutup Lumba Para Sukma 2022 begulai enggau Kontijen Sarawak ba sebuah hotel tebilang ditu, malam ensana.
Ba renggat Sukma serak tu, Sabah mujur nempa sejarah kediri empu pengudah dipadu nyadi champion penuh ti keterubah iya.
Sabah ba penuduk pemadu atas pengudah mujur tegumpulka 54 midul emas, 36 pirak enggau 35 engkeraju, Sarawak ba penuduk lumur dua nengah 50 emas, 47 pirak, 49 engkeraju ditangkan Johor ba penuduk lumur tiga ke bulih 38 emas, 30 pirak, 25 engkeraju.-TVS
