PETALING JAYA, 2 Nov: Tim Sarawak United FC enggau Melaka United FC sah nadai agi bemain ba pekit Liga Super 2023, pengudah apil sida minta lisin nasional ditulak.
Tuai Pegawai Eksekutif Liga Main Bol Malaysia (MFL) Stuart Ramalingam madah, apil kededua tim nya ditulak Komiti Apil Meri Lisin Kelab MFL (AB), seriris enggau Artikel 3.4.4 baka ke udah ditanggam dalam Atur Meri Lisin Kelab MFL Edisi 2022 nengah sebengkah aum sebedau tu.
Iya madah pekara nya dibantaika sehari tu (kemari), lalu ngemataka pemutus digaga First Instance Body (FIB) kena 12 Oktober tu tadi, nadai berubah.
“Bepelasarka ngagai resia atur serah, aku enda ulih madah pekara ke udah tauka enda dianjung tauka pekara ti ngujungka apil nya puntan (apil kededua tim),” ku iya ba aum pemberita ditu, kemari.
Sebedau tu, Chairman Meri Lisin Kelab MFL FIB Sheikh Mohd Nasir Sheikh Mohd Sharif madah Melaka United puntan mantaika bukti mayar gaji betangguh pemain enggau pegawai nyentuk June enggau Ogos taun tu.
Ungkup Sarawak United, Sheikh Mohd Nasir madah, sida puntan nitihka atur wang enggau semangat lumba, sereta ngembuan dua kes enggau Serakup Main Bol Entarabansa (FIFA) enggau Bilik Pemutar Penyarut FIFA (DRC) udah ngaga pemutus bekaul enggau ex-pemain, Sandro Da Silva Mendonca enggau Taylor Francis George Regan.
Taja pia, kededua kelab nya udah diberi timpuh seminggu nyentuk 19 Oktober tu tadi endur mantaika apil ngulihka lisin nasional.
Berebak enggau nya, Stuart madah MFL agi bedau nerima sebarang timbal rasmi ari Sarawak United enggau Melaka United, taja raban sida udah nganjung pemutus apil ngagai kededua tim nya tengahari kemari.
Nya alai, iya madah atur nulak apil kededua tim ngujungka semina 16 tim dibanding 18 tim ti deka besemekih ba pekit Liga Super musin baru.
Ku iya, bepelasarka struktur liga musin baru, kededua kelab nya bepeluang bemain ba Liga M3, tang semua nya bepanggai ngagai kaunsil pengatur liga nya iya nya Liga Main Bol Amatur (AFL).
Ba pemansang bukai, Stuart madah MFL naka tu nadai ngubah haribulan endur ngatur semi final kedua Trofi Malaysia kena 20 November tu, taja pan iya diatur sehari pengudah hari ngundi ba Pengawa Bepilih Besaike-15 (PRU15). – TVS
