KUALA LUMPUR, 7 Okt: Bantuan Keluarga Malaysia 2023 deka meri pemaik ngagai 8.7 juta iku penerima ke nguna ungkup penyampau RM7.8 bilion.
BKM 2023 iya nya bantu komprehensif ke dikemanahka agi enti dibanding enggau Bantuan Sara Hidup 2020 ti ngaul 5 juta iku penerima ke nguna ungkup penyampau RM5 bilion.
Menteri Pekara Wang, Tengku Datuk Seri Zafrul Abdul Aziz madahka, perintah endang ngemeratka pengelantang rayat ke kurang asil penatai pemisi enggau raban B40.
“Bantu duit ba baruh JKM enggau BKM ungkup taun 2023 deka ngelui ari RM10 bilion sereta dikearapka ulih mantu ngelempungka tating belanja penerima seraya diguna manah.
“Berindik ari pemaik ke diterima rayat, perintah besai nengah Agih Belanja 2023 ngemanahka agi Bantuan Keluarga Malaysia (BKM),” ku iya madah rambau mantaika Agih Belanja 2023 ti ngangkatka rambai jaku ‘Keluarga Malaysia, Makmur Bersama’ di Dewan Rakyat.
Iya madahka, ba pun taun baru ruang bilik ti bulih asil penatai pemisi tetiap bulan kurang RM2,500 enggau ngibun lima iku anak tauka lebih deka nerima BKM penyampau RM2,500.
“Tu iya nya kategori baru ti nyadi siti singkang ke diambi perintah dikena ngelempungka tating ruang bilik ti melanja mayuh anak.
“Ruang bilik ke ngibun empat iku anak, deka nerima BKM entara RM1,000 nyentuk RM2,000,” ku iya madah.
Nangkanka nya, ruang bilik ti bulih asil penatai pemisi RM2,500 nyentuk RM5,000, BKM ti disediaka iya nya RM500 nyentuk RM1,250 bepanggai ba penyampau anak.
Zafrul madahka, orang lunggar umur ke nadai laki tauka bini enggau orang bujang sida deka nerima BKM penyampau RM600 enggau RM350 bepanggai ba takat asil penatai pemisi.
“Ba taun 2023, bantu tambah penyampau RM500 ngagai indai tauka apai tunggal ke bisi anak diibun deka diteruska.
“Tu bereti apai tauka indai tunggal patut nerima bantu maksimum nyentuk RM3,000.
“Taka BKM maksimum tu nambah ti dibanding RM2,500 taun tu,” ku iya madah. – TVS
