LUBOK ANTU, 7 Okt: Peranak ke mendam di menua pesisir tetap ngemeratka pelajar anak sida enda ngira pemar enggau penanggul ke ditapi.
Pia mega sukung ari sekula ti nyadika sida terus ransing nganjung anak besekula berengkah ari umur lima taun ngambika ulih nerima pelajar tumu ke manah baka di mengeri.
Ambika banding, di SK Nanga Menjuau, Ulu Skrang bisi nyendiaka rumah ungkup apai indai bemalam lebuh nganjung anak sida besekula ba palan nyeridi anak mit iya nya Rumah Arau.
Ku Kepala Pengajar, Alexander Patrick madah rumah arau tu disediaka sekula dikena ngemudahka apai indai nganjung anak tebal agi sida ke datai ari rumah panjai ke jauh ari sekula.
“Apai indai nembiak mit ulih bemalam ba dia seraya ngibun anak sida ke besekula. Apai indai ke bemalam ditu besilih enggau pangan diri nyaga anak.
“Kebuah pia, nembiak mit beumur lima enggau enam taun ke bedau tama sekula primari enda ulih bemalam ba buding ketegal agi begunaka sukung enggau perati ari apai indai sida,” ku iya madah.
Nangkan ke nya, Anderson Juwing siku orang ke ngibun anak ba rumah nya madah, pemisi rumah arau ke disediaka sekula nya ngemudahka sida nganjung anak berindik ari rumah panjai sida jauh sereta akses jalai alun ke bedau ba tikas ke manah ti nyadi penanggul sida pulai hari.
“Rumah tu sigi endur kami diau lebuh nguan anak besekula laban rumah panjai kami jauh sereta akses jalai ke bedau manah enti sema kami pulai hari nganjung anak ngagai pra sekula.
“Kami berasai lempung bisi rumah tu laban lebuh hari ujan jalai lichin lalu kadang-kadang enti nguna mutosikal pan suah panchit mega. Berasai nyamai udah bisi rumah arau tu.
“Pemisi rumah tu meri pemaik ngagai apai indai ari lebih kurang lima buah rumah panjai nganjung anak ke sekula, lalu kami bemalam ditu lima hari iya nya sepemanjai nembiak sekula. Ujung minggu kami pulai ke rumah panjai,” ku iya madah agi.
Rumah arau tu disikap enggau perengka guna baka bilik mandi, bilik tinduk sereta dapur ke guna apai indai ke bemalam ba dia.
Entudi ke nya, Monica Mengan madahka pemisi rumah arau tu muka peluang ngagai nembiak mit di menua pesisir nerima pelajar tumu.
“Berasai nyamai bisi fasiliti ke baka tu laban ulih meri peluang ngagai anak kami belajar tumu. Kelimpah ari nengah jalai darat, nengah jalai ai pan lama nyauka ngambi timpuh tiga jam. Nyau berasai lempung bisi rumah tu,” ku iya madah. – TVS
