BINTULU, 25 Sept: Pesta Tatau 2022 deka diatur kena 1 nyentuk 16 Oktober 2022 ti bepalan ba Pasar Lama Tatau enggau Waterfront Tatau.
Menteri ba Opis Premier Sarawak, Datuk John Sikie Tayai madahka, Pesta Tatau 2022 dijangka ngerichahka pasar Mit Tatau pengudah dua taun enda diatur ketegal pengekai pandemik COVID-19.
“Mayuh macham aktiviti enggau program deka diatur sepemanjai Pesta Tatau 2022.
“Semua program ke diatur ukai semina mantaika seni enggau main asal, tang mega bisi ngayanka mayuh macham produk pemakai asal rayat pupu bansa ke mendam ba pelilih Tatau,” ku iya madah rambau Aum Penyelarasan Pesta Tatau 2022 BIL 3 & Aum Media Pesta Tatau apin lama ke udah.
John Sikie ke mega Kaban Kunsil Nengeri (ADUN) Kakus nerangka, Pesta Tatau tu endang patut diatur dikena negutka agi kaul entara peranak pupu bansa ke datai ngulu program nya sekalika sida ke diau ba dia enggau ari pelilih bukai.
“Entara program ke narit ati beserimbai enggau Pesta Tatau iya nya Bejalai Bebala Mayuh tauka Niti Daun ti disereta rayat pupu bansa enggau etnik ba Tatau baka Iban, Melayu, Cina, Punan, Beketan, Orang Ulu, Vaie sereta ke bukai,” ku iya.
Iya madahka, entara program bukai ke diatur iya nya Pekit Ratu Etnik Fest 2022, Power Boat, Perahu Berhias, Sukan Rakyat, Tatau Mini Traditional Food, Pekit Bermukun, Gendang Pampat enggau mayuh macham aktiviti ke bukai ti ngerichahka agi Pesta Tatau taun tu.
Pesta Tatau 2022 serak tu bisi nyendiaka 31 program enggau pekit seraya ngangauka sekeda artis tebilang Sarawak merindang mensia mayuh sepemanjai pesta nya diatur.
Berebak ari nya, Komiti Pesta Tatau nyaran penyampau lebih 30,000 iku temuai ngulu Pesta Tatau ti nyerangkung nyaran rayat ari luar Sarawak baka ari Brunei Darussalam ngambi bagi ba dalam pekit Power Boat.
“Kitai nesau enggau meransang peranak di Tatau tauka ba luar Tatau sampal sama datai ngerichahka pesta tu sereta mantu nyungkak sektor dagang temuai enggau ekonomi rayat di pelilih Tatau,” ku iya madah agi. – TVS
