SIBU, 30 Jun: Kaban Kunsil Nengeri (ADUN) Bawang Assan, Datuk Seri Wong Soon Koh meri jamin iya deka terus negi agenda pemansang inklusif di sitak Bawang Assan dikena nentu nadai siku rayat tinggal pemansang.
Iya nyemetak madah, pekara nya ditegi iya dikena nentu nasip komuniti menua pesisir kelebih agi di menua ulu di sitak Bawang Assan tejamin lalu nya terus nyadi agenda besai iya.
“Seagi aku diberi pengandal nyadi pengari rayat ditu, aku deka terus nyukung pemansang inklusif di sitak tu.
“Aku deka nentu nadai komuniti di Bawang Assan ditu tinggal pemansang,” ku iya.
Soon Koh mansutka jaku nya rambau Pengerami Ngiling Tikai di Rumah Munie Sawang, Bukit Besai ditu, kemari.
Iya madah, pemansang infrastruktur aja enda chukup enti nadai digembar enggau pemansang sosial enggau pengawa negap budaya.
Ba senentang nya, iya ngaku pangku pengawa komuniti Iban di Bukit Besai terus nyaga pesaka enggau identiti budaya nengah pengawa ngintu Gawai Dayak enggau Ngiling Tikai.
Ku terang iya, pengerami Ngiling Tikai ukai semina dikena nutup Gawai Dayak tang nyadi kelai penegap budaya enggau penyerakup komuniti menua pesisir ti patut dijaga seriris enggau juluk pemansang nengeri tu.-TVS
