KUCHING, 30 Jun: Opis Kereja Raya Sarawak mesti ngerumban Projek Ngemanah Jalai Menua Pesisir lebih agi ba kandang endur ke udah bisi jalai batang.
Direktor Opis Kereja Raya Sarawak Dr. Cassidy anak Morris madah tu endang utai ke dipinta rayat enggau nyadi komitmen perintah manggai taun 2030.
“Genap opis tauka ejensi lebih agi di bagi menua ke apin ngembuan mayuh menua pesisir, patut lengkas ngaduka pelin pengawa sechara sistematik dikena ngemanah arung jalai enggau jematan dikena nentuka pengelantang enggau penyerang rayat ke idup di menua pesisir,” ku iya.
Iya mansutka jaku nya rambau Gempuru Ninting Bulan JKR Bagi Menua Kapit ti nungkatka rambai jaku ‘Menjulang Integriti, Memacu Pembangunan Pedalaman diatur di Kapit, empai lama.
Nangkan ke nya, Cassidy bisi ngelansa pasal kuing tuju strategik opis nya ungkup tengan kedua taun 2025.
Dia iya ngelalau beguna amat genap iku staf JKR Kapit mangku pengawa penuh enggau prinsip, pengeliat ati enggau semangat ke tinggi laban menua Kapit betapi enggau mayuh pemar baka jauh ari mengeri, suntuk kereban logistik sereta isu jalai.
Nya alai, ku iya JKR Sarawak deka terus komited dalam bejalaika pangku pengawa nyadi ejensi teknikal besai nengeri, seriris enggau juluk dalam ngangkayka integriti enggau ngerandang pemansang infrastruktur di sitak menua pesisir Sarawak.
“Integriti iya nya pugu ngagai semua macham pengarap mensia mayuh.
“Tu endang ulah besai ke mida kita nyadi pengereja pengawa perintah ke tegap runding sereta mereti,” ku tandu Cassidy.
Berebak enggau nya, iya meransang semua staf JKR Kapit terus nyadi staring pemansang enda ngira dedini endur sida dianjung gawa.
“Kereja pengawa enggau naka ulih, anang ngelengka ke integriti lalu patut gawa ungkup rayat,” ku iya.
Cassidy madah staf JKR endang nyadi tulang belakang ngagai pemansang menua pesisir ngujungka semua pengawa ke digaga taja iya mit tang nya deka meri empas besai ngagai rayat ti chukup ngandalka JKR ulih mai ubah pemansang ngagai menua sida.
“Keingat rayat enda meda sapa kitai, tang rayat deka meda asil pengawa kitai,” ku iya.
Urung 152 pegawai JKR bisi ngulu gempuru nya ti mandangka komitmen sepanjai maya raban JKR dalam negapka semangat profesionalisme sereta nyungkak kualiti servis infrastruktur ungkup rayat seriris enggau slogan ‘We Build for You’.-TVS
