KUCHING, 27 Jun: Opis Kereja Raya patut ngena teknologi moden baka ‘Building Information Modeling’ (BIM) enggau ‘digital twinning’ dalam projek besai baka ke benung dipejalaika ungkup projek Pan Borneo enggau jalai di menua pesisir.
Menteri Kereja Raya Dato Sri Alexander Nanta Linggi nyemetak madahka teknologi nya begunaka amat dikena nentuka kualiti, penyikar enggau kos bejalaika projek nya ba tikas ke optimum.
“Nya alai, aku meransang JKR Sarawak enggau semua ejensi bekaul bela bekerejasama enggau Opis Menteri Kereja Raya ungkup projek pilot teknologi tu ke berengkah enggau projek di Kapit,” ku Nanta nengah sebengkah penerang ke dibantai ba laman Facebook iya empu sehari tu tadi.
Ngelansa pasal pengerami Ngiling Tikai Gawai Dayak 2025 ke diatur kemari, Nanta madah pengerami nya dipenyadi Sapit Premier Sarawak Datuk Amar Douglas Uggah Embas sereta bisi digulu Sapit Menteri ba Opis Premier Sarawak (Undang-Undang enggau Adat Bumiputera) Datuk Jefferson Jamit Unyat sereta Direktor JKR Nengeri Sarawak Dr Cassidy Morris.
Berebak enggau nya, Nanta meransang semua raban nyengkaum JKR, Opis Perintah Lokal, komuniti enggau kunteriktor bela bekerejasama enggau pangan diri dikena nentuka semua projek ke benung tejanggal sereta ngembuan penanggul teknikal ulih teputar enggau lengkas.
“Nuju rayat Kapit enggau Sarawak, aku besemaya Opis Menteri Kereja Raya deka terus ransing bejalaika pengawa ngemanah enggau ngerembaika bungkur jalai perintah besai enggau nengeri.
“Kelimpah ari nya dikena nentuka pengawa nya bejalai enggau efisyen sereta nemban nyadi belanja deka diguna enggau manah enggau meri empas besai ke pemaik rayat dudi hari lebih agi sida ke diau ba menua pesisir,” ku iya.
Nanta mega ngarapka pengerami nya terus diatur dudi hari laban nya mandangka kelai terima kasih, tanda sukung ngagai pangan diri sereta pengelantang ke diasai begulai.-TVS
