KUCHING, 26 Jun: Australia mantaika pengingin ati deka bekerejasama enggau Sarawak, lebih agi bekaul enggau sukut pengelandik teknikal enggau bekunsi penemu, beduduk ari atur progresif nengeri tu ke dipeda nyadi reta berega dikena nempa pengidup dudi hari ke lebih meruan.
Sapit Menteri Kuasa enggau Pemeruan Rampa Menua Sarawak Datuk Dr Hazland Abang Hipni madah juluk nya dipansutka Menteri Dagang, Pengawa Bejual enggau Kaul Asia ungkup Northern Territory Australia Robyn Cahill maya datai nemuai meri basa ngagai iya kemari.
“Maya betemu nya pekara ke diberi perati iya nya penau kerejasama antara Sarawak enggau Australia dalam bidang kuasa enggau pemeruan rampa menua,” ku iya nengah sebengkah penerang sehari tu tadi.
Dr Hazland madah, maya randua iya bisi bekunsika inisiatif besai Sarawak dibaruh opis menteri iya, nyengkaum Polisi Ubah Kuasa Sarawak (SET-P), Pelin Besai Pemeruan Sarawak 2030 (SSB) enggau Pelin Kuing Tuju Ekonomi Hidrogen Sarawak (SHER) ke nempa langkar kereja ungkup ubah nengeri nuju ekonomi gadung.
Iya madha sida mega berundingka peluang ba sukut pemansang kapasiti, kerejasama antara industri engggau kaban akademik, sereta projek perintis dalam bidang baka ngasilka hidrogen, nangkap karbon enggau mutarka pekara bepelasarka rampa pengeraja asal.
“Randau tu udah ngelai siti agi pemansang dikena negapka kaul global Sarawak dalam bidang pemeruan rampa menua enggau negapka komitmen nengeri ngagai kerejasama antarabansa dalam napi pemar klimet enggau kuasa,” ku iya.-TVS
