KUALA LUMPUR, 26 Jun: Apai indai dipinta meransang bala anak ngambi bagi ba main chatur laban berupai mantu meransang daya pikir enggau nambahka pemintar runding.
Kaban Parlimen Bandar Tun Razak Datuk Seri Dr Wan Azizah Wan Ismail madah penyelai main nya laban nya dipeda inklusif enggau ulih dipasuk semua raban nadai ngira umur, penempa enggau saiz tubuh.
“Kitai meransang apai indai enggau diri sebilik lebih agi ba sitak Parlimen Bandar Tun Razak terus meri sukung ngagai bala anak masuk pekit.
“Kitai deka nentuka bala anak enda teparuk ngereja ulah negatif,” ku iya maya bejadika Pekit Chatur Beraban Tebuka Nasional 2025 – Trofi PMX ditu, sehari tu tadi.
Dr Wan Azizah ke mega bini Menteri Besai mega muji Serakup Besai Chatur Malaysia (MCF) laban udah chakah ngemansangka main nya ba menua tu nengah pengawa ngatur bemacham seminar, kelas sereta pekit nyau deka ninting minggu.
Iya nyemetak madahka pekit baka nya ukai semina pekit tang mega menalan endur nempa bakat baru menua nyengkaum Grandmaster keterubah Malaysia.
“Pekit tu ukai semina siti pekit, iya siti peransang endur angkat lalu kitai deka menua kitai nempa Grandmaster keterubah…lalu kitai mega deka Grandmaster indu,” ku iya.
Berindik ari nya, ku iya kerejasama penuh antara Opis Menteri Nembiak enggau Lumba, Opis Menteri Pelajar, Opis Menteri Pelajar Tinggi sereta Gerempung enggau kelab chatur patut dipejalaika dikena negapka ekosistem ba pemansang main nya.-TVS
