KEDU Sapit Kepala Menteri Sarawak, Datuk Patinggi Tan Sri Alfred Jabu Numpang ngasaika iring tuai dibaruh Premier Sarawak, Datuk Patinggi Tan Sri Abang Johari Tun Openg endang siku tuai ti ngemeratka pemansang modal mensia nengah pelajar.
Ku iya madah, inisiatif Premier dalam negapka sistem pelajar lebih agi ngemeratka pasal STEM (Sains, Teknologi, Injiniring enggau Matematik) betuju ngemansangka rayat sereta nentuka Sarawak enda tinggal ba jeman moden.
“Iya siku tuai ti siru ngagai rayat, mudah begulai enggau rayat sereta seruran mendingka sada nyawa sida. Iya sanggup bejalai ngagai selampur nengeri tu nyengkaum kandang menua pesisir dikena nentuka infrastruktur pemun disediaka ungkup pengelantang rayat.
“Kelimpah ari nya, iya mega bisi ke menua luar laban deka ngulihka penemu ungkup pemaik pemansang nengeri tu,” ku iya dalam sebengkah randau khas beserimbai enggau pengerami Hari Sarawak ti deka diintu kena 22 Julai tu.
Jabu nyemetak madahka penemuai Premier ngagai menua luar ukai semina betuju ngulihka penemu aja, tang mega mujur matak pemeranak puku ari menua luar beranakka puku di Sarawak sereta muka peluang ekonomi baru.
Nya alai, iya nesau bala apai indai nganjung anak sida besekula sereta meransang sida nampung pelajar ngagai tikas ke pemadu tinggi lebih agi enggau pemisi pelajar pechuma ba universiti ke dipenggi perintah Sarawak manggai taun 2026.
“Sarawak deka muka peluang pelajar ngagai semua sechara penuh. Bala anak kitai mesti pintar ngerebut peluang ke bisi disediaka perintah,” ku iya.
Berebak enggau nya, Jabu mega meri terima kasih ngagai Perintah Besai laban udah meri tangkup pengawa ngagai Perintah Sarawak ungkup merambu, bejalaika sereta matau projek pemansang di nengeri tu empu.
“Suba kitai teikat enggau Perintah Besai ari sukut agih belanja dikena ngaga perengka guna pemun.
“Enti sesebengkah projek tejanggal, projek nya patut ditender baru lalu tu ngasuh masau awak sereta pengelaun.
“Nya alai, Sarawak merambu deka diberi tanggungpengawa bejalaika projek di nengeri tu empu lalu diatu udah mujur dipejalaika,” ku iya.
Lebuh nyimpul randau nya, Jabu nerangka iring tuai Abang Johari ngembuan visyen ti terang, ngemeratka pemansang sereta ngembuan sistem administrasyen ti sikar.
“Aku besampi ngambika Premier Sarawak seruran diberi pengerai ke manah sereta umur ke panjai ngambika ulih terus ngiring Sarawak nuju pengidup jemah ti lebih meruan sereta tebilang,” ku iya.- TVS
