KUALA LUMPUR, 23 Jun: Sapit Menteri Besai enggau raban menteri Kabinet bela ngenataika penyinu ati ngagai Premier Sarawak Tan Sri Abang Johari Tun Openg bekau ari pemidang bini iya, Puan Sri Juma’ani Tuanku Bujang pagi tu tadi.
Sapit Menteri Besai Datuk Seri Dr Ahmad Zahid Hamidi nengah sebengkah penerang ngasaika pemidang niang siti pengelenyau besai ngagai Premier Sarawak sereta rayat nengeri nya.
“Pemidang orang ke disayau ke udah nyadi tawing pengidup ke chukup taluk, pengimbai maya tusah enggau senang sereta nyadi penyukung besai pejalai pengidup iring tuai Premier tentu iya siti pengelenyau besai enggau dikeingat.
“Niang ke dikelala aku siku indu ke nelap, penuh budi basa sereta chukup rinduka pengawa pengasih enggau nulung rayat, lebih agi dalam negapka orang indu enggau komuniti di Sarawak,” ku iya.
Iya madah pemidang niang ukai semina diasai sida sebilik aja, tang mega semua rayat Sarawak ke chukup ingatka jasa enggau tulung ari iya ngelama tu.
“Aku ngarika Perintah Besai datai pagi tu ngabas sida YAB Premier Sarawak sebilik, ngenataika penyinu ati enggau madahka solidariti sereta sampi semua rayat Malaysia bekau ari pemidang ke chukup diasaka tu.
“Aku besampika semengat niang diberi pengelantang, diampun semua dosa enggau diengkah begulai enggau orang ke badas. Arapka YAB Premier sereta sida sebilik diberi pengering, pengeliat ati nempuh penguji ke datai maya tu,” ku iya.
Berebak enggau nya, Sapit Menteri Besai Datuk Seri Fadillah Yusof nengah posting ba laman Facebook bela ngenataika penyinu ati enggau sinu enggau pemidang niang ke diasai pengelenyau besai ngagai rayat Sarawak.
“Nya siti pengelenyau besai ukai semina ngagai sida niang sebilik tang mega semua rayat Sarawak. Salam takziah ngagai YAB Premier enggau semua sida niang sebilik,” ku iya.
Udah nya, sekeda menteri Kabinet mega ngenataika penyinu ati ngagai Premier Sarawak sereta sida sebilik nengah penerang enggau posting ba media rama.
Menteri Komunikasyen Datuk Fahmi Fadzil nengah Facebook bela besampika Abang Johari sebilik diberi penyabar enggau pengering napi pemidang tu.
“Sampi kami seruran ngiring Tan Sri. Arapka Tuhan nerima semua pemanah, ngampunka semua dosa enggau ngengkahka iya begulai enggau orang badas,” ku iya.
Menteri Betanam Betupi enggau Jamin Pemakai Datuk Seri Mohamad Sabu mega ngasaika pemidang niang siti pengelenyau besai, ukai semina ngagai sida sebilik tang mega ngagai nengeri Sarawak.
“Aku besampika semengat niang diberi pengelantang enggau diengkah begulai enggau orang badas. Arapka YAB Premier enggau sida sebilik diberi pengering sereta pengeliat ati napi penusah tu,” ku iya.
Menteri Pemansang Indu, Ruang Bilik enggau Komuniti Datuk Seri Nancy Shukri nengah Facebook ngasaika niang siku tukuh indu ke bepenemu sereta meri sukung tegap ngagai iring Premier Sarawak.
“Niang ke beumur 76 taun, endang siku tukuh indu ke diau diri tang mayuh penemu, seruran nyukung iring tuai YAB Premier taja enda memunyi tang penuh enggau pengering.
“Ba belakamg pemujur sesiku tuai, bediri siku indu ke puh enggau taluk, bejalaika pangku pengawa besai dalam nempa pengering enggau mantu meri pengelantang ngagai rayat,” ku iya.
Nancy madah ulah nyadi indai, nyadi ketuai enggau penelap niang meruan dikenang ukai semina ngagai sebilik tang mega rayat Sarawak ke kala dibantu terus tauka enda.
Bela ngenataika penyinu ati ngagai Premier Sarawak iya nya Menteri Kereja Raya Datuk Seri Alexander Nanta Linggi, Menteri Pelajar Fadhlina Sidek, Menteri ba Opis Menteri Besai (Pekara Pengarap) Datuk Dr Mohd Na’im Mokhtar, Menteri ba Opis Menteri Besai (Wilayah Persekutuan) Datuk Seri Dr Zaliha Mustafa, Menteri Pengawa Dagang Dalam Menua enggau Kos Pengidup Datuk Armizan Mohd Ali, Menteri Digital Gobind Singh Deo enggau Menteri Pengerai Datuk Seri Dr Dzulkefly Ahmad.
Juma’ani, 76, midang ba sebuah palan perubat peribit di Kuching pukul 3.34 pagi.
Niang iya nya anak ngagai TYT Nengeri Sarawak kedua Tun Tuanku Bujang Tuanku Othman.
Niang diberi basa kepenydi ba Masjid Jamek Negeri naka pukul 12 tengah hari sebedau ke dianjung ngagai Pendam Islam Samariang, Petra Jaya, Kuching.-TVS
